每逢新年，例必會到親朋戚友屋企拜年，兩手空空又點得！市面上的賀年禮品林林總總，選購時最大的考慮可以話係價錢同產品種類，今日就以價錢作為區分，精選多款賀年禮盒向親友表達心意，豐儉由人！
記者：梁彩燕
攝影：林栢鈞、楊錦文、蔡鴻雯
Model：Irene
$201以上：豪華賀年禮盒
喺新正頭，除咗派利是要大破慳囊之外，買賀年禮物都要花上一筆！向至親拜年又或趁新年致送禮物給老闆表心意，就要花點心思喇！可以買個包羅萬有的禮物籃、應節朱古力、靚酒，甚至海味都夠晒得體。
應節公雞朱古力
富有中國色彩的GODIVA雞年禮盒，朱古力包住順滑的榛果茸，再分別配搭朱古力奶油、楓葉咖啡白朱古力、酒味朱古力醬同胡桃果仁鬆脆，味道多多。一盒18粒，其中2至6粒係雞形朱古力。
售價：$290（d）
超豪推介：LouisXIII酒中極品
被稱為「烈酒之王」嘅人頭馬路易十三，精瑩剔透嘅酒色經由幾百種陳釀調製而成，700ml容量，配合精雕細琢嘅水晶玻璃瓶，好似一件藝術品。用嚟送禮，絕對是名貴之選。
售價：$13,800（h）
禮盒造型贏晒
金雞獻瑞賀年禮盒三合一豪華禮盒，裏面有舞獅果仁禮盒、舞龍雜錦曲奇禮盒同爆竹朱古力禮盒，集合紹香園嘅果仁、龍島朱古力同Deschamps曲奇。盒上的娃娃造型及屋形禮盒，夠晒應節。
原價：$588
特價：$368（a）
老闆至啱：中西式至尊禮物籃
上班族買嘢畀老闆，當然要夠得體！呢個中西薈萃至尊禮物盒，有中國茶、冬菇、瑤柱、鮑魚榛子仁，重有較西式的朱古力、曲奇餅、咖啡、鵝肝醬、紅酒及JohnnyWalker黑牌威士忌，夠晒有睇頭。
售價：$1,388（e）
得體茶葉禮盒
若然有朋友鍾意飲茶的話，送呢個茶葉禮盒就啱晒。陳年普洱配搭粒粒香鐵觀音，各有300克，加上別致禮盒包裝，名貴得體。
售價：$360（e）
滋補三式海味
去拜年想大方得體，買參茸海味至合時。啟泰出品嘅「新春三寶」，內有100克散翅、225克花菇同150克南非螺片，樣樣都咁滋補。
售價：$338（a）
名牌雜錦朱古力
拜年禮盒始終都係以朱古力最為普遍，想特別一點的話，可以選擇呢款ZarteMomente雜錦牛奶朱古力禮盒。軟滑的牛奶朱古力包住唔同味道的內層，多種味道時刻保持新鮮感。
售價：$299（a）
$101-$200：設計吸引選擇多
短短幾日新年假期，竟然要進行密集式拜年行動，禮盒買得貴又負擔唔起、買得太平又驚唔好意思，其實百零蚊都有好多選擇。得意設計、傳統款式、又或好意頭之選都有，相信梗有一款吸引到你。
食胡十三么朱古力
香港好多人都鍾意打麻將，如果親朋戚友都好此道的話，送呢鋪食胡的十三么朱古力畀佢，見到實開心。內有14粒純朱古力，可惜無得意的麻雀造型！
售價：$105（e）
造型吸引：阿公阿婆曲奇
AuntStella的曲奇出名新鮮，呢兩款陶瓷禮盒，以公公婆婆作為造型的盛器，以人手燒製同上色，更加是獨一無二。每盒約250克雜錦曲奇，內有芝士、粟米、咖啡等味道。
售價：$190/每盒（c）
用得又食得：米奇杯碟雜錦果仁
米奇老鼠每年都有新搞作，今次呢套禮盒，除咗有開心果、杏仁、花生同青豆等果仁小食外，最特別係附送埋兩套杯碟，包裝精美，小朋友見到實開心。
售價：$168（b）
牡丹鴛鴦禮盒
皇樓系列的曲奇禮盒，包裝獨特。以紅色紗布作為包裝，雙層的牡丹鴛鴦禮盒內有曲奇、水果糕點、脆餅同朱古力等食品，確實係有外表有內涵之作。
原價：$238
特價：$198（b）
鮑魚麵音樂盒
送禮畀長輩，最好都係送啲較實際的產品。呢款金卓牌鮑魚麵禮盒，內裏有10個獨立包裝的鮑魚麵，最盞鬼係包裝係一個音樂盒，長者收到實有驚喜！
售價：$155（e）
著名朱古力杏仁餅
送禮當然係送名牌最好，德國Niederegger朱古力杏仁餅禮盒，每粒都以獨立包裝，外形大方得體，況且朱古力乃大人細路都鍾愛之物，包保唔會送錯。
售價：$198（a）
養顏燕窩女士至愛
燕窩含豐富蛋白質同氨基酸，可養顏及增強免疫力。白蘭氏冰糖燕窩6支裝，選用精選燕窩同冰糖液製成，送畀女士實鍾意。
原價：$280
特價：$169（a）
雙色日式果子
日式甜品之中，果子最受女生歡迎。呢款松榮羽二重雙色果子禮盒。內裏各有12件紅色的梅子味同啡色的豆沙茸果子，兩款口味都各有特色。
原價：$135
特價：$129（g）
$100蚊以下：經濟得體
咪以為平平哋唔夠一百蚊就無好嘢，只要你識得揀，都一樣可以揀到大方得體的賀年禮盒。款式選擇唔少，有曲奇、雜錦果仁、茶葉禮盒、XO醬或海味等任你揀！
平靚正：帶Kitty去拜年
卡通人物永遠都受歡迎，無論大人同細路都咁鍾意嘅HelloKitty，推出了呢款牛奶味曲奇，價錢化算，包裝精美，絕對是平靚正推介！
售價：$29.9（b）
瑞士手做曲奇
TanteAgathe瑞士進口曲奇，標榜全人手製作，最特別係曲奇加入了不同的水果味道，如檸檬、桃味、橙味、肉桂同呍呢拿等，口感及香味獨特。
售價：$98（b）
香脆雜錦薄餅燒
紅帽子雜錦果仁薄餅燒禮盒，日本製造，集合花生芝麻、南瓜子杏仁、抹茶紅豆、黃豆粉黑豆同柚子杏仁等味道，款款都咁香脆薄身，送禮後齊齊分享，好滋味！
原價：$125
特價：$69.9（a）
雲南茶葉
送茶為禮夠大體，呢款茶葉禮盒總共有140克，分別係蘭貴人同茉莉香味茶葉，產自雲南地區，茶香清新，屬賀年送禮佳品。
原價：$108
特價：$98（b）
金裝XO醬
唔知從何時開始，專用來做調味或煮餸的XO醬、蠔油都出埋禮盒裝。以舊酒新瓶形象示人改革成功。李錦記XO醬金裝禮盒，80克三支裝，包裝精美！
原價：$155.7
特價：$96.8（f）
冬菇猴頭菇禮盒
送禮講求實際的話，大可選擇呢款由南北行推出的冬菇＋猴頭菇禮盒裝，包裝得體又實用，多吃菌類食物對身體又有益健康，送畀長者最啱。
售價：$78（b）
售賣點：
(a）西田百貨 26941111 沙田新城市廣場3期2樓
(b）崇光百貨 28338338 銅鑼灣軒尼詩道555號
(c）city'super 23758222 尖沙嘴海港城3樓
(d）GODIVA 21755701 尖沙嘴海港城3321店
(e）Great 29189986 金鐘太古廣場地庫
(f）各惠康分店 ＊售價各分店略有不同
(g）各零食物語27979967
(h）RemyFineWines28455995金鐘太古廣場311店