今年沙田區中央公園沒有花卉展也沒有擺年宵，就靠源禾路球場獨力支撐。乾貨及濕貨區分別在網球場的兩邊。乾貨區攤位數量確不算多，不過就不用人逼逼行得舒服，而且得意精警精品頗多，是為卧虎藏龍的年宵市場。
記者：陳慧敏
攝影：伍慶泉
Models：Branche（D8）、SinLing
檔口2 意頭風車手作梘
「天麗」擺賣的都是意頭貨居多，超巨型風車身高4呎（高過小妹妹呀！），七色花花造型又夠搶眼，另有立體風車款，買一個轉大運，影相當日賣$68，𠵱家減到$45。
而手作番梘有除有番茄味、可可粉及雞蛋味外，還有以碌柚葉又磨又煲製成的碌柚葉番梘，可避邪同時殺菌，成年都冇衰氣埋身，全港只此一家。
檔口26 功夫雞三兄弟
一群理工大學學生齊齊開雞竇，出售的是得意雞公仔。手工摺雞仔，圓滾滾，做小擺設特別可愛，備有HelloKitty造型，在此購物還有小香包一個做贈品呢！穿上功夫裝的雞公仔，有大中細三兄弟，是為花市最型靚雞，附有雞孵蛋座台一個，坐得穩陣。
檔口6 一飛沖天微型槍
早幾年的垂直飛天炮就說怕傷人，這支微型「納米比亞槍」可飛到三層樓高，子彈輕飄飄，射到人不痛不癢。最頂癮是幾位老闆貪玩搞鬼，遠遠已經鬼殺咁嘈地持槍兜生意，熱鬧非常。另，雖說送猴迎雞，但經廣告一煲，望見這長臂馬騮，個個都忍不住要Fing一Fing。
檔口13 聽住音樂騎馬仔
「三顧雞盧」出售的毛毛馬頭玩具，小朋友可以一嘗拉頭馬滋味，只要你一按其右耳，就有馬叫、馬蹄聲及牛仔音樂播出，認真頂癮。
平平無奇動物紙花樽擺設，拉開完來是頂造型搞鬼的紙帽，有雞頭、豬頭、貓頭及熊貓頭等多款任擇。
沙田源禾路球場
地址：沙田源禾路球場（禾輋邨對面，沙田運動場側）
交通：沙田火車站徒步10分鐘；或乘85、86、80K、85K等巴士在源禾路球場下車。
元朗東頭工業區遊樂場
出賣學生設計
位於元朗的東頭工業區年宵，除售賣大路年花外，還有更多春季開花的特色小盆栽。花農表示，由於位置接近花圃，而今年天氣熱，好多花都提早開得燦爛，所以價錢會較為便宜，想買就要趁早。最特別是場內有元朗信義中學學生售賣自家設計的作品。
檔口4 買隻雞保你畢業
這檔「六福雞寶」是由一班中學生齊心合力主理的，檔內最有心思的要是保你畢業立方雞，立方母雞內藏立方小雞一雙，其中一隻一出世就戴住四方帽一副學者咁格，想仔女順利畢業，入貨啦！
檔口118 搶眼鬱金香
一般只在花店買到一枝枝的鬱金香，像這樣成盆上才$60，兩日淋一次水已OK，紅豔又搶眼。
檔口21 抵玩木偶公仔
木偶公仔已經愈來愈稀有，「痴根Chicken」的布公仔手工精細，有發癲博士、爆炸頭黑人又有溫柔老婆婆，$25極抵玩。
而英式風格的玻璃畫燭臺，點上蠟蠋，搖曳火光將彩色玻璃畫映在桌子上。
檔口熟食檔A舖 醫肚豬扒包
行到肚餓係時候醫肚，即叫即做炭燒豬扒包，豬扒燒得香軟而不油膩，食一個已經飽肚。
元朗東頭工業區遊樂場
地址：元朗東頭工業區遊樂場（鈞樂新邨斜對面）
交通：元朗大馬路徒步10分鐘；或乘68X在安樂路下車過寶業街。