今日年三十晚，食完團年飯就係接連幾日嘅新春假期；呢幾日最多人做嘅相信都係留守「家」中，周圍拜年或者等拜年！大家與其被無聊嘅「重播」電視節目疲勞轟炸，倒不如自己打「碟」煲齣自選好戲！今日就搵嚟碟場Sales推介吓，揀啲最叫人容易遺漏嘅04年好片畀大家，趁住年尾收爐前入定貨，悠長年假翻煲正片過好年！
記者、攝影：朱崇德
逢假期煲碟，已經成為好多香港人嘅生活習慣，農曆新年好多舖頭都收爐，睇碟就變得更加重要；暫時知到好多「單舖式」嘅DVD店，都會初一、二放年假，大勢係初三開市，想買碟真係要趁今日。但幸好旺角有部份連鎖式DVD店，話明初一、二會照常營業，春節期間想補飛，都唔會話搵碟無門。
西片類
《無痛失戀》占基利玩愛情片
「占基利唔搞笑拍愛情片？」呢個係好多人Miss《無痛失戀》嘅原因。大膽講句，《無》係占從影以來最好一套片；拋去硬搞笑嘅包袱，以最溫柔深情來示人，原來占竟然有咁感性嘅另一面！故事講醫學界發明了一種「失戀洗腦服務」，占為咗忘記前女友肥溫（琦溫絲莉）而接受洗腦，但過程中發現，戀愛往事，不論歡喜或憂傷，原來都非常真摰動人，占最後想搏命反抗，但一切已太晚。
故事寫得非常好，只要拍過拖，戲中都會搵到自己的影子，佢對男女感情之事，一刀切中要害，每睇一次都叫人有所啟發！梗係啦，故事出自怪雞編劇《玩謝麥高維治》嘅查理考夫曼！如果04年DVD西片你只揀一齣睇，呢套一定係首位！
《大魚奇緣》深刻父子情
怪雞導演添布頓嘅《大魚奇緣》，又係一齣難得深情嘅電影，題材係西片中較少論及嘅父子情！唔少人家中都有個吹水老爸，不過呢個《大魚》老竇吹得更大，做仔嘅只感到以他為恥，父子關係從此交惡，更演化至老死不雙往還境地；直至老父患病彌留之際，為子者先發現天荒夜譚式故事，仿似是耶非耶！
電影高潮處，是頭半齣戲天馬行空，睇得人目不暇給；結局是情理之中，但意料之外，雖然是平淡的父子情，難得是他的真摯感人能耐，令每個觀者熱淚盈眶之餘，又為主角解開心結而有欣慰嘅感覺。
《愛尋迷》4角暗戀故事
初睇《愛尋迷》好大程度為了超索女角戴安古嘉，少見嘅骨感美人，戲中重有激情嘅演出。故事改編自96年上映的法國名作《非常公寓》，開場睇以為一見鍾情古仔，不過愈睇愈多美麗的邂逅，最後才發覺原來是一個4角交錯的暗戀故事，而且是另一癡心者的精心布局，當真有如愛情捉迷藏。
《HELLBOY》最易Miss猛片
原本香港曾排了《HELLBOY》上映，可惜因為1區碟過早推出，所以最後打消公映計劃，改為齋出碟，所以令好多人錯過此片；導演是大有來頭的吉勒摩迪特洛。故事改編自美國近年大熱同名漫畫，主角原為撒旦之子，但在經年慮月的感化下，竟成了正義之士。喜歡《X-MEN》一類電影者，必睇！
港產類
《地下鐵》幾米式愛情故事
《地下鐵》是台灣作家幾米式愛情故事，是繼《向左走．向右走》後改編拍成電影的第二部作品，故事分為兩條主線；一是香港地下鐵，樂天盲女楊千嬅與忽然失明的梁朝偉結上情緣。另一條線則是台灣俊男張震，在上海地鐵遇上同是天涯淪落人嘅董潔。兩則故事一個主題，在車站來去匆匆的人群中，以努力及期盼找尋真愛。
《大事件》現場直播警賊鬥智
杜琪峰作品，一套好典型的警賊故事！開場一Take過10分鐘槍戰，極有氣勢，香港好少電影有如此逼力，電影中大家會見到新形象的悍匪任賢齊，演得絕對超水準！故事講述電視攝製隊，無意中攝得警隊於街頭被悍匪重創。為重整士氣，全港三萬名警察誓要捉拿這批重犯歸案，副指揮官陳慧琳打算將整個行動現場直播，利用傳媒一洗警隊頹風。
《A-1頭條》港產電影罕見懸疑
香港影壇近年小見拍得非常好的懸疑片，故事講《潮流》版記者李心潔，發現前男友在一幢交通意外中死亡，內情極有可疑，在多番偵查下，竟然發現與香港富商、警務人員有關，總編輯梁家輝的行徑亦突然變得怪異。玲最終找到有力證據，遂趕回報館揭發這宗必定轟動社會的頭條新聞。
襟煲類
《大長今》VCD阿今正傳
《大長今》喺韓國本土一早播完全套，為免老翻截胡，香港代理嗱嗱聲宣布推出原裝正版《大長今》電視劇VCD。第一、二輯BoxSet啱啱派街，賣價每盒$180，雖然第三輯要農曆年後先出街，不過估計仍快過無綫嘅時間表。順帶一提，韓國播放《大長今》共54集，而香港電視版及VCD版均以45分鐘為一集，故此集數會增至70集，大家唔好誤會港版係加長咗嘅版本。
《導盲犬小Q之一生》足本電視版
好多人睇過電影版《導盲犬小Q》都話好戲，不過相對睇過原著之人，相信都會覺得故事有啲剪到支離破碎，所要就有電視版《導盲犬小Q之一生》出現；一套7集，同原故事真係十足十相近。新春佳節，小朋友睇就最啱啦！
賀歲開心DVD推介
查詢
（a）DVDPro（23326326）
地址:旺角奶路臣街6E德發商場地庫B4舖
（b）WideSight（27899965）
地址：旺角亞皆老街67號地下