特區七年敗績纍纍，香港同胞變成港燦，就算喺珠江三角洲小市鎮幹部面前，特區高官都抬唔起頭。不過，噚日廖秀冬（圖）就威番一次，重係喺天子腳下嘅京城攞彩。
事緣地鐵成功打出去，竟然取得北京市四號線三十年經營權，係中國交通史上一個里程碑。呢單項目噚日簽約，咁當然係地鐵飛上去北京簽啦，除咗地鐵總裁周松崗外，重請咗廖秀冬同王岐山做見證人，簽約儀式之後，冬冬同王市長一齊飲番杯㖭。
內地有句順口溜，話去到北京，先知自己官小。特區一個環境運輸及工務局局長，當然係上唔得枱，但噚日同朱鎔基愛將，曾經做過建設銀行行長，搞過粵海重組，又掌過海南，現在身為京畿大員嘅王岐山平起平坐，廖秀冬都算冇乜失禮人囉，希望第日呢條線順順利利，賺大錢，唔使成日查找不足。
傳真︰2623-9278
電郵︰