年三十晚，傳統晚飯後會到年宵花市行一轉，今年經濟向好，相信花市會人頭湧湧更熱鬧。乙酉雞年，年宵攤檔的產品及檔名，亦大多以雞為主，「飛甩雞毛」、「春田雞雞」、「雞蛋仔」，大賣雞雞毛公仔、吹氣公仔，更有不少本地創作的玩意，新鮮感十足。今晚一於去猴迎雞，逛轉年宵行好運！
記者：梁珮瑜
攝影：周旭文
模特兒：Shermaine&Matthew（StarzPeople）
檔口4 可愛雞蛋仔
此雞蛋仔可以黐上衫、可以掛喺電話，但就唔可以食！本地創作人兼畢業生Ben，以街頭小食雞蛋仔做靈感，設計出名為雞蛋仔仔的公仔。有5種表情的布公仔，背面係魔術貼，可以組合拼成一底雞蛋仔，重可以周圍黐，超可愛！
地址：界限街旺角花墟遊樂場
交通：旺角火車站或地鐵站，徒步3分鐘
《功夫》熱潮玩轉旺角花墟
旺角界限街花墟年宵市場係九龍區最大的花市，約有180個乾貨及濕貨攤位，而論新鮮創意，今年花墟年宵絕對唔輸蝕，除咗抵買靚花及本地創意產品外，全場至搶就係大玩《功夫》熱！
檔口42 斧頭幫吹氣道具
其中乾貨檔「Ilove功夫」就由數名《功夫》Fans合資，大賣自家設計的吹氣斧頭幫斧頭、高帽及波板糖，而今晚重會有20多個展翅計劃學員，穿起禮服扮斧頭幫搞氣氛！
檔口166 去花墟買花
花墟當然多又平又靚嘅年花，至搶手就係大大株桃花，重有近年花市勁Hit的小盆栽，而檔主話紅螞蟻事件未有影響價錢，售價與往年差不多。
地址：界限街旺角花墟遊樂場
交通：旺角火車站或地鐵站，徒步3分鐘