全港最大的維多利亞公園年宵花市，乾及濕貨檔約有500個，絕對係行花市首選。不但年花選擇多，本地設計的新年產品種類多兼得意過癮。而今年必買，當然係至應節的吹氣雞及雞公仔！
地址：維多利亞公園
交通：銅鑼灣地鐵站
檔口365 年花推介：萬壽大波菊
檔主話去年大波菊好受歡迎，今年一樣好旺場。而歐元勁升，所以歐洲入口的花價就一般漲價2至3成，其他國家入口的，價錢就與去年差唔多。
檔口370-371 清雅水仙花
今年天氣好水仙花特別靚，價錢與往年差不多。如果想水仙合時開花，就唔好擺放於太陽下，熟嘅就少啲水，生嘅就要加多點水。
檔口191 抵死過癮至Hit鋤大懵
今年維園最搶產品之一，必定係由30多名理工學生會學生，自家設計的鋤大懵紙牌！玩法與「鋤大Ｄ」一樣，但紙牌就畫上香港政治人物，如A牌係特首董建華、2仔係長毛等，而唯一的女性就係Q牌的盧少蘭，相當搞鬼！
檔口276 三大熱賣雞產品
遊勻維園花市，最搶手、最多人攞住有以下3大產品：1.吹氣皇冠，男人變皇上、女人變皇后。2.雞仔吹氣槌仔，應節又Qutie。3.七彩大風車，雖然唔係新鮮事，但人人都想新年轉個好運！今晚不妨留意吓，唔拎住是但一樣就唔會Out！
檔口小食檔B舖 要食！雪糕新搞作
年宵食品當然唔少得咖喱或青咖喱魚蛋、格仔餅等，今年不妨一試雪糕春卷及雪糕炸波。雪糕春卷外皮香脆，內裏包住紅豆雪糕及粒粒紅豆；而雪糕炸波裏面係香滑呍呢拿雪糕及一粒麻糬，好香口！
