八方日前講過，何偉途千錯萬錯，錯在加入咗民主黨，所以東莞市公安局喺嚴厲聲明中，都係好體諒咁要求老嫖客對其言論作出公開澄清，又話何偉途一定係受到外力威迫之下，先至會亂講嘢，唔使講明，矛頭直指「迫」佢嘅有關組織係民主黨。咁你民主黨主席李永達死唔認都冇用，因為我公安局點會錯？肯定一早聽晒佢哋同何家嘅電話，睇晒佢哋嘅信件。
我公安肯定手上有大把證人同證據，如果唔係，點敢咁大聲警告何生，如果唔澄清，將不得不採取進一步行動。
其實八方真係好想真相大白，反正何偉途已經投奔台匪，又話明我公安講乜佢都唔回應，咁樣我公安真係唔應該再俾佢欺騙同誤導民眾，即時就應該將所有鐵證攞出嚟，趁何偉途心中有屎，死都唔肯講三更半夜點解俾個靚女DJ入房，又唔肯講同個女仔係間房做緊乜，打多佢兩錘，等佢唔止生牛皮癬，唔止肝炎，更加唔講得嘢，唔寫得字，最好人間蒸發，以後唔會再欺負我國的女同胞。
當然最醒目係民建聯，佢哋嘅黨員陳鑑林忽發奇想，話喺公安局發放更多證據之餘，同時不如俾啲傳媒上埋去參觀，實地考察。
當然最好嘅安排係由陳鑑林帶隊，全港各大小傳媒包括《蘋果日報》都一齊入去東莞市公安局收容教育所睇吓，如果陳議員肯犧牲小我，留喺收教所住番幾日，咁就更正，可以親身體會何偉途嘅生活實況，睇吓佢有冇講大話。
之後如果陳議員都冇生皮膚病，就更可證實何偉途嘅牛皮癬係天生兼遺傳嘅，與我收教所冇關。
呢個睇怕係雞年第一單頭條新聞，不過，有人覺得中方喺港人返大陸尋歡嘅問題上大細超，其他政黨就冇事，偏偏民主黨一出事，就要拉要鎖，好啦，你話有一日何偉途棄暗投明，係咪就雞年出入平安？
傳真︰2623-9278
電郵︰