張天愛嫁予王盛德移居美國，對農曆新年依然重視。早前張天愛回港專程到中環選購大紅年花，皆因風水師贈言紅花有助其夫的事業，她又大掃中式小擺設和日式曲奇回美度歲。
張天愛早前回港，抽空到中環中西花店挑選年花、舞獅和彩龍小擺設等，點綴寫字樓，她專挑鮮紅及名字吉祥的花種，如鮮紅雞冠花、紅色富貴子、黃色煙花菊等。
張天愛說：「其實我哋美國嘅花園由花王打理，成日都係種白色花，好靚，但係冇理好唔好意頭，不過今年李建軍老師（曾為其婚禮擇吉日的風水師）話紅色會好旺我同Russell（其夫王盛德），幫佢事業闖高峯，所以我要喺唐人街買好多紅色嘅繡球花、桃紅色嘅蘭花布置家居。」
一向愛花的張天愛又透露十多年前更曾與友人合資在藍塘道開設花店，她說：「嗰時好鍾意花，但又未有生意，咪日日自己落單畀錢買番畀自己，後來夥計創出心形、圓形嘅花束，生意就慢慢好。」
提到農曆新年，張天愛表示美國氣氛一樣好，她會邀請猶太電影圈的朋友在家開新年派對，由中國籍家廚煮燒雞、年糕，她會親自下廚煲冬菇雞湯，玩通宵，她說：「我哋買好多五蚊、十蚊美金嘅小禮物，玩番啲小朋友先玩嘅傳波仔、爭櫈仔，好單純、好好玩！」她更大量選購特色糖果年貨，留待送禮之用，包括日式杏仁曲奇、蘋果肉朱古力、椰子花生等。
採訪：DebbieLum
攝影：RickyChan
場地：中西花店（中環威靈頓街）
