恒指升209點，升幅1.54%。跑贏大市嘅恒指成份股有12隻。5隻重磅股滙控（005）、中移動（941）、和黃（013）、中海油（883）同長實（001），總共拉起恒指143點。
新地C輪4643：新地（016）收71.75元，升0.75元，升幅1.1%，跑慢過恒指少少。眾C輪中，除咗1隻較冷門嘅9548之外，升幅最大嘅係4643，進帳11.8%，成交金額最大嘅亦係佢。新地C輪有好多隻槓桿率大過4643，但升幅比唔上4643，理由係溢價高好多，同時新地升幅亦唔夠勁。
新地C輪中，正路之選仍係4643，6月初到期，輪價38仙，溢價2.9%，槓桿率18.9倍（有效11.2倍），引伸波幅19.5%。短炒或者炒上炒落，揀4643，切勿搞啲3月份夠鐘嘅C輪。
長實C輪3798：長實收71.8元，升1.25元或1.8%，長實C輪威過新地C輪好多，最大升幅係低溢價冷門貨4467，進帳27%。跟市短炒長實C輪，贏輸快趣見功嘅係3798，7月到期，輪價46.5仙，溢價4.3%，槓桿率15.4倍（有效8.5倍），引伸波幅23.7%。
想畀少啲溢價，則諗3504，5月中到期，輪價39.5仙，溢價3.0%，槓桿率18.2倍（有效10倍），引伸波幅25.1%。
有隻長實C輪4634，7月到期，數據相當靚，不過太少成交，整日得2球易手。炒冷門輪，除非對正股好有信心，或者注碼極細，否則免得過就免。
章盛