今日大除夕，唔少人已提早放假。不過小初識得幾位地產經紀老友，佢哋唔止冇holidaymood，重摩拳擦掌，準備大發新年財。
地產市道近日又見旺番，幾間主要地產代理已決定初一至初三照常開工，趁市旺斬多幾両。
賣咗廿幾年樓嘅經紀陳話，今年樓市依然睇好，事關香港人𠵱家買樓，供樓支出只佔收入嘅3成幾，遠低於高峯期嗰陣嘅7、8成，樓價即使再升一兩成，市民仍可負擔得起。
幾間大地產代理如美聯物業（1200）、中原地產、利嘉閣同港置等，均已表明今年會大開分行，積極擴充，如果唔好景，點會雄心勃勃？經紀陳又話，美國上周五公布嘅就業數據平平，市場估計聯儲局再加息的空間有限，對樓市發展更加有利。
既然係咁，美聯物業就要留意。先幾日恒地（012）四叔將一面「恒基金牌」，頒畀美聯黃老闆，表揚美聯去年賣恒地樓取得佳績。攞完金牌後，美聯連日回升，昨日再漲3.7%，報4.175元，可吼股價回到4.10元樓下買番多少。
慕容小初