憑主唱日本動畫《機動戰士高達》多首主題曲而火速上位嘅日本女歌手玉置成實，近日推出處女寫真集《TN》，佢為咗今次呢本寫真集，重好罕有咁着泳衣影相。另外，寫真集裏面亦輯錄咗佢上年夏天舉行首次個人演唱會嘅花絮。
今年十六歲嘅玉置成實，讀書時參加歌唱比賽而踏足藝能界。之後，玉置憑主唱動畫《機動戰士高達》嘅主題曲，吸納咗唔少動畫迷fans。玉置平時喺舞台上密密實實，但佢喺呢本處女寫真集入面，破例以水着示人，着住件紅色花花泳衣，盡顯青春氣息。
𠵱家一個人喺東京生活嘅玉置，今次亦專誠返去鄉下和歌山嘅小學取景。當日一班師弟妹重特別出嚟迎接佢，搞到佢好感動。
玉置又自爆同一般日本學生無異，原來佢讀小學五年班嘅時候，已經學人染金毛，而最近又沉迷喺指甲畫花，真係貪靚。