年近歲晚，大市成交縮減，行情則在早輪調整後，轉為窄幅上落，沽壓比預期為輕，上月24日的13320會否係今次調整低位，暫時仍未能確認，但可能性不能抹煞，大市即使再向下尋底，跌幅料亦有限，13000大關支持應經得起考驗。
從近期大市的表現看來，有迹象顯示大行同基金係收緊貨，收得較積極的，係中資、紅籌同國企股，呢一輪，亦係呢類股份表現得較強勢。
踏入2005年，第一個禮拜，港股就大幅下跌，1月3日至7日，恒指大跌655點，國指大跌228點，跟着而來的4個禮拜，恒指在窄幅上落，國指就連續上升。1月10日至14日，恒指跌80點，國指升27點；17至21日，恒指跌13點，國指升26點；24日至28日，恒指升169點，國指就大升145點；1月31日至2月2日，恒指跌64點，國指升38點。以收市指數計，國指4個禮拜共上升236點。
迎接國企下一個大浪，金屬、石化同原料股都係可優先選取的對象。鞍鋼（347）同中鋁（2600）強勢，中線有機會獲利2至3成。石化股盈利會遠比市場預期為佳，在宣布業績前後，應該會有好表現，筆者對吉林化工（368）同上海石化（338）特別看好，尤其係吉化，以04年PE計，只得3到4倍，股價有頗大機會升上3.20至3.50元水平。
去年煤炭供應緊張，煤價大幅上升，全國32家重點煤炭企業，盈利便上升1.9倍。兗州煤業（1171）去年首3季盈利大升1.2倍，至1.9億元（人民幣．下同），估計04年全年獲利31億元，每股盈利1.04元（折0.98港元）。
05年，煤價繼續上升，煤炭供貨大會雖已結束，但煤炭供應商與電廠仍未就電煤合約價達成共識，兗煤有信心，合約價會高過國家指導的8%升幅。
集團近年收購多個煤礦，令現有的儲備量達49億噸（去年的銷量係4000萬噸），為未來盈利的增長提供動力。05年，兗煤盈利估計可進一步上升到37億元，每股盈利1.16港元，以12倍PE計，1年目標價為14元。
郭兆誠