喺香港藝術館舉行嘅「法國印象派繪畫珍品展」，真係叫好叫座，噚日又有成三千幾人入場，就連平日公務繁忙嘅財經事務及庫務局局長馬時亨都聞風而至。噚日馬局長趁放假，同埋老婆、囡囡入場欣賞呢批名畫。要欣賞稀世珍品，高官都冇特權，馬局長同其他市民一樣，排隊買飛，再等足半個鐘頭，先可以入到會場。
去過法國、英國同荷蘭嘅藝術館賞畫嘅馬局長好高興咁話，藝術無國界，呢批名畫喺平時唔知要搭幾多趟飛機先睇得晒，呢個機會真係難得。佢話自己喺呢方面嘅經驗只算係小學生，佢太太同囡囡先係專家。大飽眼福之後，馬局長大讚今次嘅展出，唯一美中不足係現場燈光唔夠，佢建議主辦單位學吓外國咁，唔同畫會畀唔同燈光。等咗咁耐，馬局長另一個收穫係見到唔少本地市民帶住小朋友嚟賞畫，佢話感覺好鼓舞，因為藝術細胞係要由細個開始培養。
傳真︰2623-9278
電郵︰