電腦Ｊ請幾位十五年前嘅舊拍檔、同事，在年尾食番餐飯，點知有兩位臨時冇到，編輯Ｙ話起唔到身，女記者Ｋ就不見蹤影。咁佢哋就走寶咯，上海總會嘅紅燒魚唇非常正斗，雲吞雞湯極清甜，電腦Ｊ鍾意嘅紅燒肉亦有水準。上海總會轉換廚房、人手後，與以前相比，一啲菜式好啲，一啲菜式差咗，一啲保持差唔多，所以一啲會員食完之後，猛話新廚房好，另外一批就猛彈，話退咗步，左丁山在上海總會裝修後食過十幾次，總覺得同以前比較，有好咗，有差咗，視乎你食乜嘢啫，好難一概而論。
十幾年冇見過嘅Ｓ小妹，以前係幫左丁山打字嘅，佢嘅打字速度驚人，寫一段四百字稿交畀佢，自己去廁所打過轉，行到返座位，佢已經可以交篇打字稿畀左丁山校正。佢由打字員做起，升到做組長，再升至出版業務經理，𠵱家呢？Ｓ小妹面紅紅咁話：「左老闆，我自己搞出版社呀！」真厲害，榮升老闆，好多風險嘅噃？Ｓ小妹話：「我哋專出版婦女食譜、菜譜、食經，叫做做得住，今日就搬寫字樓，嘻嘻，返去華蘭路呀，真係還原基本步，諗唔到。」
Ｓ小妹在華蘭中心開始打工，十五年後以老闆身份返去開寫字樓，可喜可賀。有時諗吓，香港地有好多機會，只怕自己唔去爭取啫。呢日電腦Ｊ搵埋電腦Ｉ嚟，十三年冇見佢，問佢搞邊科？電腦Ｉ遞上名片，係網站副總編輯，十三年前，佢跟左丁山搞馬經資料。另外當年嘅記者C，現在已經係財經版老總。重見舊人，十分高興，既高興佢哋努力有成，亦高興佢哋重肯畀面同左丁山呢位原地踏步嘅寫稿佬食飯。