做DJ起家嘅陳海琪離開廣播界三年，之前由無綫總經理陳志雲力邀主持《香港直播》節目，呢個節目由最初嘅一點（約六萬五千觀眾人次）收視爬升到有六點，點知喺呢一刻就傳出佢俾死敵白韻琴，喺無綫揸弗人方逸華面前狂篤背脊，實行踢走佢，然後自己同男友謝偉俊一齊做節目。
雖然之前白姐姐否認其事，但姑勿論個傳聞係真定假，馮仁昭收到風，陳海琪真係冇得撈，下個月二十五號會係佢最後一日返工，噚日馮仁昭打電話畀陳海琪，佢強調今次係佢自己走，至於係咪因為白姐姐篤背脊，陳海琪話：「咁高層嘅嘢我唔知。」
陳海琪又話自己今次算係功成身退，佢嘅新計劃係首先要去攝太歲同轉風車，總結成件事，陳海琪好玄咁話：「萬般帶不走，惟有業隨身。」唔知佢係講緊邊個呢？
去年賺到盤滿缽滿嘅2R，喺農曆新年前，會將所有嘅積蓄滙給喺新加坡嘅父母，佢哋噚日出席活動時話因父母打算喺星洲買舖收租，但由於資金唔多充足，所以佢哋打算將六位數字嘅積蓄全數送畀父母，十分孝順。
陳鍵鋒同張美妮噚日去天水圍出席香港房屋委員會新年活動「福星匯聚喜迎新」，同班街坊一齊玩遊戲，陳鍵鋒重唱咗首張學友嘅歌，歌喉唔錯，佢經理人話陳鍵鋒想出唱片，但係中間發生好多枝節，遲遲都唔成事。而陳鍵鋒呢排就忙緊拍王晶部新戲，喺年初三就做《香港直播》嘉賓。
周國賢噚日去咗奧海城，擔任「優級主持大募集」嘅評判，周國賢會喺農曆新年放兩個星期大假。
周國賢話：「我會返紐西蘭探細佬，同埋好好休息，順便攞吓靈感寫多啲好歌。另外，重可以派少啲利是，哈哈！」
噚日《甜孫爺爺》一班演員喺奧海城搞宣傳，喺《甜孫爺爺》做男主角嘅劉愷威，在宣傳海報中竟然「靠邊站」，反而方力申同楊思琦嘅大頭就放正中間，劉愷威有啲酸溜溜咁話：「咁佢係歌手，宣傳要着重外援，不過唔係poster頭大就好，做得唔好都冇用。」
港台DJ麥潤壽母親黃興上個月因為中風與世長辭，享年七十八歲，麥潤壽同家人噚日喺世界殯儀館為佢舉行佛教喪禮，遺體隨即送往歌連臣角火葬場火化，麥潤壽身穿黑西裝送母親最後一程，非常哀傷，不過佢今晚都會收拾心情返電台做節目。
陳慧琳（Kelly）日前為主唱嘅韓劇《大長今》主題曲《希望》拍MV，佢特別着咗韓國傳統服裝上陣。Kelly話自己都係「長今」迷，因為套劇入面有好多關於藥物同食物嘅知識，佢話睇完至知道喺調味料入面放木炭，就可消除怪味，所以佢唔使開工嗰陣，就會留喺屋企追劇。
