唔少人都鍾意喺新年買條新底褲，貪好意頭，因為「抵富，抵你富」吖嘛。玄學家楊天命噚日喺海港城講雞年運程，圍觀嘅市民反應唔錯，唔少人大大聲咁公開自己或者仔女嘅時辰八字，畀師傅當場贈幾句，當中重有唔少係少男少女㖭，睇嚟真係愈來愈多年輕人信風水命理。不過，師傅話新潮嘅人信風水，但又唔想又風鈴、又蟾蜍咁擺喺屋企，所以佢嚟緊會做一系列有風水功能，但款式新潮嘅家居擺設。
楊天命近排同一間產品發展公司設計咗一條「太歲底褲」，底褲腰邊印有「龍」嘅標誌，同埋代表龍嘅「巽卦」符號。楊師傅話喺雞年，龍就最合太歲，所以着條「龍底橫」就最啱，反而係唔係紅色唔緊要，白色都得。呢條底褲有唔同顏色、款式，重分男女款式。不過咁，如果生肖屬狗同龍嘅，因為出年已經合太歲，所以唔使着，着咗反而唔好。
（圖）楊師傅話喺雞年，龍最合太歲，所以着「龍底橫」就最啱。
傳真︰2623-9278
電郵︰