東莞公安局嘅反擊聲明一出，矛頭直指民主黨，八方周圍搵民主黨人回應，發現佢哋多數懶懶閒冇乜反應。同何偉途曾經做過多年戰友嘅李華明話，對事件處之泰然；有民主黨人就話，當日見到何偉途開記者會呼冤，已經估到內地公安會有此一着，遲啲再有更大嘅反彈都唔出奇。
李柱銘同八方講，佢呢兩日就會同家人朋友起程去南非度歲，玩足十一日先返香港；民主黨新黨魁李永達同立法會議員張文光就會留港消費，達仔揀咗初三赤口去行山，因為做咗主席之後好忙，少咗時間行山。
身為足球迷嘅張文光，過年節目當然唔少得捧賀歲盃場，已經買定飛睇年初一嘅港隊對巴西嘅球賽，但張文光估計，兩隊實力懸殊，佢主要都係想一睹心儀球星──「細哨」朗拿甸奴嘅風采。
傳真︰2623-9278
電郵︰