近排炒家活躍，唔少成交同佢哋有關，好似較早時熱賣嘅西環泓都，剛有炒家摸出單位，三個禮拜賺六十一萬四，逾一成三。中記李志賢話，呢件一座低層B，八百九十呎，以五百二十萬摸出。重有三座低層C，四百呎一房，以一百八十二萬摸售，獲利二十六萬，近一成七。
另外，將軍澳東港城出現九七以嚟第一宗摸貨，一座低層D，七百九十呎，成交價二百五十萬，美記黃少明話，炒家一個月執十四萬。買家係長線投資者。
東涌悅濤軒，不足兩個月連續有兩單短炒，美記陳偉平話，七座極高層E，七百三十呎，以二百萬沽出，獲利十九萬；二座高層A，千三呎，成交三百七十五萬，賺三十七萬。
至於葵涌新葵芳花園，則見炒家接銀主盤，美記袁佩雲話，D座高層四室，四百九十呎，造百三萬，每呎二千七。
重有兩日就係雞年，大年初一，繼續發售嘅樓盤雖然少過舊年，但港置就冇放棄呢個檔期。
執行董事李志成話照常營業，若果有員工初一至初三做到生意，租務可以獲得五百蚊開單利是，買賣就多一倍，有一千蚊。
另外，中原初一只係將軍澳、奧運站及上水及粉嶺全線分行冇休市，初四至全部分行開業。若果想買樓，就要留意。
新春期間，市面一片喜氣洋洋，代理就算返工，都係互相恭賀，聯誼為主，做到生意當攞個頭彩，期望自己全年好運。
上星期蘭西話，市場傳出，遠東集團主席邱德根，私人持有嘅荃灣油柑頭悠麗路八號錦柏豪苑十六座獨立屋，委託測量行暗標放售，不過，遠東方面馬上聲明，話邱主席呢批貨從未考慮過放售，亦都冇搵過高力國際做代理。
錦柏豪苑位近早前招標嘅馮積善別墅，每座面積二千四百方呎，樓齡四年，𠵱家收緊租。
天水圍嘉湖山莊樓價落後大市，成為近期買家入市目標，祥益蕭嘉偉話，近期炒家盤與銀主盤成交大增，日前就連續錄得兩宗銀主盤成交，造價同樣低市價一成。
美湖居五座中層H銀主單位，七百呎，成交價近百二萬，呎價千六。另外，樂湖居六座中層F，五百八十呎，銀主以九十二萬元沽出，每呎近千六。屋苑現有二十五個銀主放盤。
蕭嘉偉話，上個月，嘉湖一共錄得九十一宗買賣，較舊年十二月嘅六十宗，勁增五成二，主要係用家同投資者追捧。
美聯分行經理蔡俊雄話，灣仔熙華大廈B座四百呎中層，以每月六千七租出，每呎十六個半，新高。租客外國人，識廣東話，中區返工。蔡俊雄話，呢區近排多咗外籍租客。
業主八○年以二十九萬買入，一直自住，最近喺同區買咗樓，所以將單位轉租。
熙華大廈樓齡二十五年，分A及B座，共二百伙，○三年底曾進行翻新工程。四百呎單位，喺翻新前月租只係五千八到六千。
大廈𠵱家有五六個租盤，四百呎最平要七千二，四百八十呎要八千至有交易。
電郵地址：