數數手指，重有兩日就係農曆年初一，送走頑皮活潑嘅馬騮仔，接住嚟嘅同樣係生氣十足、紮紮跳嘅雞仔，希望香港踏入雞年，都好似猴年一樣，經濟增長直線上升嘅同時，失業率就直線下降，咁就皆大歡喜。
大使又再數數手指，舊年全年自己親手處理過嘅求助個案，粗略估計都有超過一百個，重未計另外兩位大使，多到大使都嚇咗一跳，乜唔係話經濟好轉嘅咩？點解重有咁多人要幫？
香港經濟重新踏入正增長、政府財赤亦都大幅減少、失業率穩步下降，但草根階層重要忍受經濟復甦期間帶來嘅陣痛。
大使幫過嘅個案，所遇嘅問題，大多不離親人過身無錢殮葬、失業陷困、獲配公屋欠搬遷費、患癌症無法支付昂貴藥費等等。
蘋果日報慈善基金嘅角色，正正就係要填補政府福利政策難以覆蓋嘅範圍，解開求助家庭嘅死結，好多家庭過咗呢關之後，都可以企番起身，積極面對將來。
展望新一年，蘋果基金仍會繼續扮演善長同埋弱勢家庭之間嘅橋樑，好好利用善款去幫助一啲有需要嘅家庭，大使喺度呼籲善長加入我哋嘅扶貧行列，實踐助人為快樂之本嘅理念。
暖流熱線
電話：29908688
傳真：23702192
電郵：
網址：