年尾流流，特區「赤的疑惑」，繼續擴散，除咗紅火蟻奇案，愈整愈騎呢，重有國家領導人紅曾，訪問南美洲，姿態得心應手，信心十足，講嘢亦愈來愈引人入勝！
紅曾同特區傳媒記者飲茶，私下交心。幾十人坐喺處聽住，紅曾話廢董在施政報告中雖有總結經驗，但「還有不足」，即是話重未夠，形成「壽爺啱啱訓完斥，紅曾再執多劑」之局！
點知特區政府漏夜榮獲「授權」發表聲明，話紅曾唔係咁講，而係高度讚揚廢董「總結經驗查找不足」，查實係早已勝利完成，圓滿結束，事件告一段落嘞咁解！
跟住香港電台幾乎再一次遭到土共政治圍攻，俾人話歪曲紅曾講說話，同民主派裏應外合，再次亂港㖭！好在處長朱培慶今次硬淨，即時表態喝住，話當晚好多特區記者在場，明明聽住紅曾講嘢，兼近距離Check埋嘴形，故此冇可能解讀錯，咁啲老左，先至悻悻然收爹！
呢件事後來就更奇咯喎！因為紅曾臨回國前，突然又嗌咪，大讚香港傳媒，報道佢訪問，係「非常及時、準確」！
咁即是話，紅曾原來，一切看在眼裏，佢又再反澄清，百分之百認同特區傳媒記者現場報道嘅第一個版本：廢董雖「總結經驗，但還有不足」，即是話，再次掌摑廢董，先至係我哋敬愛的紅曾嘅原意！
咦，咁咪即是話，原來董班子新聞處漏夜榮獲「授權」嘅「澄清」，係完全唔準確？唔怪得佢有佢嗱嗱臨「澄清」，中方新華社及第二日人民日報，一句都冇附和證實咁喇！
原來係為免自己嘅說話原意遭到「澄清」歪曲，紅曾先至飛身再補飛，以正視聽，讚特區傳媒至係講得啱咁話！唔知董班子呢次，使唔使再澄清，話查實呢一句，原來嘅說話係「記者報道及時，但阿董施政準確」，又遭到特區記者再度閹割咁呢？
赤的疑惑，繼續有來！紅火蟻之外又有紅曾奇談，睇嚟呢個政府，語無倫次，就快搞到自己都有腦膜炎咯！
傳真︰2623-9278
電郵︰