上周五美股生猛，今日港股有機會由美股帶住上去。港股若然升得太多，則高追C輪未必有太靚嘅水位，不妨稍後先至郁手，想做嘢則諗些少P輪。暫時，當個市係上落市。
滙控C輪4441：東亞（023）上周四派成績表後，二三線銀行股郁郁吓，滙控（005）上周五升0.50元，收128.50元。
滙控喺127元上下拉鋸，已有3個幾星期，本月28日派成績表，派成績表前料可守住127元（近期最低126.5元），可逐啲收集滙控C輪。
滙控C輪搵對象，有啲槓桿率非常爆炸嘅，當然贏起上嚟可以贏成條街（假如正股喺好短時間內升兩三蚊嘅話），但遇啱正股牛皮，則溢價會縮吓縮吓，引伸波幅會少啲少啲。揀4441唔會有呢啲問題，隻輪已經冇晒呢啲問題，6月尾到期，輪價45仙，負溢價0.1%，槓桿率28.6倍（有效18.2倍），引伸波幅9.9%，溢價與引伸波幅冇乜可能再縮落去。
恒指C輪：如果買大市升，揀恒指C輪，正路之選係3700，隻輪6月尾夠鐘，輪價16.5仙，溢價2.6%，槓桿率18.3倍（有效10.8倍），引伸波幅18.1%。
搏殺啲，則揀3505，5月尾夠鐘，輪價9仙，溢價3%，槓桿率35.1倍（有效16.6倍），引伸波幅14.9%。
恒指P輪：雞年來臨前個市如果急升，想做淡個邊買恒指P輪，揀3543，6月尾到期，輪價18.5仙，溢價3.5%，槓桿率9.8倍（有效6.6倍），引伸波幅21.9%。想搏殺啲，則揀3581；賭呢隻，贏輸比3543大6成左右。
章盛