葉蘊儀（Gloria）精於陶瓷工藝，早前她用日本紙黏土造出活潑可愛的應節雞公仔。Gloria希望新一年繼續開拓公仔時裝設計，並已簽了StarEast重新發展其演藝事業。以事業為重的她，去年開始在家擺設桃花，今年仍繼續這個習慣。
葉蘊儀早年於日本取得日本Deco黏土學校的教師認可資格，更曾開設陶瓷工藝學校及著書。今個農曆新年，她用日本紙黏土、顏料及簡單的工具，示範如何炮製出極具新年氣氛的公雞及兩頭小雞黏土公仔。
去年Gloria開始發展其公仔時裝設計、名為「VictoriaPeiti」系列，今年她會推出另一個新系列，她說：「今年我會設計另一個系列叫『DollyAngel』，之前嘅『VictoriaPeiti』以宮廷風格為主，今次會以casual服裝為主。我會去上海傾代理，按部就班，唔會投資好大，純以興趣為主。」
Gloria還表示已簽了StarEast，她說：「我希望喺演藝方面，會再有發展，𠵱家學番日文，之前去東京電影節時，撞番以前識得嘅日本電影人，佢哋都有鼓勵我拍番戲。」
事業以外，Gloria最關心的當然是一對子女，農曆新年將至，Gloria也有教育一對仔女有關的習俗，她說：「年三十晚會畀壓歲錢，年初一、二會帶佢哋去爺爺同公公屋企拜年，佢哋好鍾意𢭃利是，返到屋企就開始分贓。我都好enjoy派利是，因為係一個意頭。」
問單身的Gloria會否渴望行桃花運時，她笑說：「舊年開始已經喺屋企擺桃紅，我啲朋友話擺開就要擺，我今年都會繼續擺，舊年我都冇人追，不過我自己都係想以事業為重。」
採訪：RitaLeung
攝影：MatthewLam
場地：CafeInn（景隆街）
