年尾流流，人人趕買年貨，成街都係人，幾乎間間舖頭都塞滿人，小初睇見自不然會諗吓有乜嘢零售股買得過。小初自命心境緊貼時下年輕人節奏，尤其喜歡行影音電器舖，所以特別留意鍾意以大減價招徠的國美電器（493）。
國美上周公布和韓國的三星簽署策略合作協議，國美未來5年內，將向三星採購總值20億元人民幣的家電及電子產品。小初初時睇完呢單新聞都唔覺得有乜特別，但經紀黃就唔係咁睇，佢話三星係國美的主要產品供應商之一，早排大陸有謠言話國美同三星關係唔多好，引起投資者擔心國美產品供應短缺的問題，如今國美與三星齊齊出嚟握手做好朋友，可以掃清謠言，係十分正面嘅消息。
除此之外，國美早排曾講過大股東正在問緊阿爺，可唔可以將剩番的三成半國美股權注入上市公司。有分析員話，若然成事，將有利國美盈利，目標價可以調高。國美近排多利好消息，可以留意。上周五冇升跌，收7.45元，成交2052萬元。
慕容小初