意甲聯真係愈來愈黑暗，就連地位崇高嘅索夫亦受到「政治迫害」，重喺○比三輸畀森多利亞後，考慮向球會提出辭職！
「對於我嘅不公平待遇，我感到好氣憤。喺政治層面，我嘅加盟並冇幫到球隊；相反，過去兩場波，重得到球證不公平對待。」咁又係噃！前晚場波打到十分鐘，費倫已經要打少兩個；重有對拉素，對方亦有兩個入波有問題。索夫一直都唔係「隨口噏當秘笈」嘅人，球證偏幫北方三雄嘅問題的確存在。
如果就咁走咗，費倫臨急臨忙去邊度搵人？到時真係一嘢蹺起呢支老牌勁旅喇！要三思啊！
索夫都係為球隊好嘅啫，唔想因為自己同北方三雄嘅牙齒印而影響球隊。咩牙齒印？當年佢唔做國家隊教練，就係因為貝盧斯科尼質疑佢戰術有問題。貝盧斯科尼除咗係意大利總理，重係AC米蘭幕後老闆！明未？
呢輪英超球隊入貨入得比較醒，繼伯明翰彭迪安尼喺上周中處子登場即入波後，熱刺「埃及王子」美度亦喺上周六首披熱刺戰衣即有「士哥」；比較起意甲聯費倫天拿，買咁多勁人返嚟都重要係咁輸，最注目嘅保真諾夫喺同晚聯賽輸畀森多利亞○比三之役，重食埋紅牌出場㖭。
英格蘭足總日前警告各球會，但凡再發生球員辱罵球證或旁證，有關球會最高罰款高達二十五萬鎊（約三百六十五萬港元），認真揦脷。淨係睇上周中曼聯對阿仙奴，朗尼三番四次對球證唔禮貌，同埋唔多尊重。呢個價錢係細球會買入一個質素稍次球員嘅數目，應該夠阻嚇性囉。
曼聯球星朗尼球場外極為大使，英國報章披露年紀輕輕嘅佢早前逛公司個半鐘，就用咗一萬八千鎊（約二十六萬港元），係佢三成幾周薪，而佢買嘅包括Armani、Prada同Gucci等名牌，據講朗尼為討好未婚妻高蓮歡心；而高蓮成日吼住折頭至出擊，真係夠現實。
雷耶斯以破球會紀錄嘅轉會費加盟阿仙奴表現唔錯，可惜最近突然患思鄉病。雷耶斯一路都唔適應英格蘭粗野嘅踢法，上次作客奧脫福被踢傷令他決心要離開；而佢屋企人亦唔喺度，搞到情緒好低落。最弊係佢重落選埋最近嘅國家隊，更加促使佢離開阿仙奴嘅決心喎。
逢周一至周五見報