遠展（035）橫行咗兩個月，消化得七七八八，又屆撈底時。睇遠展，唔淨止係集團同威尼斯人澳門酒店大製作，遠展中國房地產及香港酒店業務，近幾年積極經營，而且見到成績。中國頭炮係上海加州花園項目，5300個單位，等待鄰近地鐵站通車，善價而沽，05年度應該開始嚟料，估計項目總純利18億元至19億元，分5年入帳，每年4億元。跟住落嚟，遠展重有城都及廣州地產項目，食髓知味。
香港呢邊，隨住遠展喺中環、上環、銅鑼灣及灣仔等旺區酒店項目，今年陸續投入服務，提供上1800客房，連同澳門大型酒店第一期項目落成，遠展擁有超過3800客房，酒店王國成形，07年度打後，每年為集團提供斷億計純利收益。
再講，遠展已經唔係幾粒臣貨仔時、狂升暴跌炒格，家陣升格基金股，由上年5月見0.9元低位後，股價係有條理咁沿住上升軌向上游，走勢有藍籌風範。穩穩陣陣，長升長有，沿老虎仔百億市值夢想推進，到時遠展股價，講緊7蚊樓上。
渝港（613）上月頭見0.182元，創出1年高位之後，呢勻燦爛歸於平淡，又講兩點。第一，渝港勝在銀両多，04年中期手頭淨現金4.2億元，現價市值10億元，即係話，佔咗4成係現兜兜銀紙，股價愈跌愈正，皆因應佔現金比重愈大。第二，渝港上月公布，正考慮緊若干投資，並處於初步協商階段，為股價埋下一條刺激元素。春節前後，港股若然橫風橫雨，渝港重係喺現水位打底，拒絕再跌，估佢醞釀大茶飯，唔怕小注收集。
錢雋