佘詩曼和陳浩民的緋聞傳了接近三年，去年阿佘曾稱要觀察對方，才決定有否發展機會。相隔一年，阿佘笑言仍未觀察完，她日前在將軍澳接受本報訪問時說：「答案不變，都係好朋友，佢都唔喺香港，你估我唔使做咩？日拍夜拍㗎，咁樣好難踏前一步，都冇時間去認真相處吓。」
不過，全世界都認定阿佘和陳浩民已是一對，阿佘即笑道：「有好處有唔好處，好處係好似好專一，唔好處係會令我減少被人追嘅機會。」到底阿佘還要觀察陳浩民哪一方面？她笑說：「姻緣呢樣嘢冇得心急，我係唔想離婚嘅人，唔鍾意見到小朋友嘅爹哋媽咪分開，唔開心成世。𠵱家開始拍拖，都有好大機會會諗到結婚，所以對拍拖唔會輕舉妄動。」
在阿佘心目中，陳浩民有優點亦有缺點，她說：「佢好樂觀、好開心，冇機心，缺點係優柔寡斷。」阿佘自與陳浩民傳拍拖後，幾乎與緋聞斬纜，惟獨年前拍攝劇集《西關大少》時與張智霖再傳緋聞，不過她對傳言卻嗤之以鼻說：「清者自清，我哋私底下從來未試過出一次街，我對呢啲新聞已經處之泰然，幾難再傷害到我。」
阿佘說，曾希望二十七歲結婚，因為她很喜歡小孩子，心想趁三十歲前生BB，孩子會更加健康活潑，但現已二十九歲的她說：「都過咗呢個年紀，幻滅咗咯，但𠵱家醫學昌明，亦都唔再諗幾時結婚生仔，睇緣份啦！」
其實在阿佘心裏，她要的男朋友會是哪一類人？她想了一想便笑道：「大家相處舒服係大前提，唔需要掩飾，但我對拍拖都好鬼自私，要佢喺身邊時就喺身邊，有嘢做時就唔想佢喺度。」
