新年咩都要新，好多人會喺過年前買定新衫新褲新鞋，不過斷估點都唔會買架新車過年啩？新年流流，點都要好好睇睇，就算架車唔係新都絕對唔可以污糟邋遢失禮人。除咗畀錢洗車屋大清洗外，其實市面都有好多功能多元化、易用好使嘅洗車用品，趁住年廿八幫自己愛驅洗邋遢，親手嚟個車身車廂大掃除都只係花三兩粒鐘，好輕鬆啫！
記者：馬慶武
攝影：陳偉強
Model：Crystal（D8）
由車頭上蠟、起蠟
要車身立立令，首先要用洗車水洗車身，捽到全身起泡後就可以用清水清洗抹乾。待全車乾透後就可以進行打蠟，由車頭開始上蠟，待全車上勻蠟後就可以再由車頭開始起蠟，捽吓捽吓好快靚晒。如果唔想咁煩咁攰，重有一啲清潔兼打蠟嘅洗車水，用佢洗一次，部車就會有打咗蠟嘅效果，不過當然無做到足咁好效果啦！
烈日當空忌上蠟
平時懶得洗車，趁新年快到，點都應該幫架車嚟個大掃除。就算係愛車之人，個個禮拜都會抹吓架車，趁年廿八都要應吓節，洗得徹底啲、乾淨啲。其實洗車並唔係一件咁麻煩嘅事，停車場有噴射式水喉當然方便，就算只係有一桶水，配合市面一啲幾合一嘅洗車潔淨劑，以及一啲方便易用、針對車身不同部份嘅清潔劑，洗埋全車窿窿罅罅，都一樣可以快手搞掂！
洗車'sChoices
只要將一片清潔片放入一桶清水內攪勻，就會即刻起泡變成一桶洗車水，一包有二十塊，每桶落一至兩塊已經夠。
濃縮清潔片$55（台日）
啱晒想去到邊洗到邊，唔想帶住一樽二樽清潔劑喺車嘅車主。
車身清潔劑 $58（金輪）
專門去除車身表面嘅頑固污迹，如偈油迹、膠迹等。
修護洗車水$58（台日）
呢樽洗車水特別在有修護功效，據講可以去除因打蠟次數過多，出現喺車身表面嘅蜘蛛網紋。
打蠟'sChoices
洗車打蠟二合一清潔劑 $58（台日）
唔使上蠟起蠟，亦唔使先洗乾淨架車，噴上車抹吓捽吓之後沖水就掂。
車用紙巾$18（金輪）
就算洗完車打完蠟，有時都會唔小心整番污糟，呢包濕紙巾就可以隨時隨地清潔車身，重有打蠟效果，夠過癮！
車蠟$85（台日）
適用於任何顏色車身嘅車蠟，內附上蠟海綿。
工具'sChoices
伸縮洗車棒頭$68（台日）
呢支伸縮洗車棒頭部份係用軟布造成，可以用嚟擦洗車身或者打蠟。好用在棒桿可以伸長，就算細細粒嘅女車主或者係七人車車主，都可以輕鬆抹車頂。
除霧海綿擦$58（台日）
呢個內含除霧劑嘅海綿擦除可以抹清玻璃外，抹後更可令玻璃擁有跣水效能。
雙頭刷$36（台日）
呢個雙頭刷最啱清潔窿罅位，較硬嘅一邊可以用嚟刷胎軨，而白色一邊就可以刷清車名標誌或燈邊罅位。
壓縮毛巾$19（金輪）
唔想擺到車尾廂左一條右一條污糟毛巾，呢盒12條裝嘅壓縮毛巾就幫到手喇，只需要將壓縮毛巾濕水，好快就變成濕毛巾。
加強水壓噴嘴 $78（台日）
連接水喉可以令射出嘅水壓力更大，亦可以調校出水嘅集中程度。
吸水布 $58（金輪）
吸水力特強嘅布，最啱洗完車準備上蠟前抹乾車身時用，除咗可以抹車身外，抹玻璃窗一樣好使好用。
濕氣重車廂易生菌
洗完車身，係時候嚟個車廂大掃除，清潔一下最貼身嘅座椅內櫳。要留意嘅係對待真皮內櫳同絲絨內櫳係應該用唔同嘅專用清潔劑，而絲絨清潔劑更可以一併清埋地氈嘅污迹，非常方便。
內櫳清掃乾淨後，仍未可以收工。因為近排天氣潮濕，就算行車開行冷氣，車廂裏面都可能較易滋生細菌產生異味，若然遇到呢個問題，就可以用一啲消臭殺菌嘅噴霧焗一焗個車廂，之後放番個靚靚香座，話咁快就可以令愛驅內外都咁靚仔，揸去拜年都醒神啲啦！
車廂除臭除菌'sChoices
除臭清潔劑$45（金輪）
專用嚟清潔絲絨座椅嘅清潔劑，有除臭功能，噴嘴頭硬毛刷更可以刷去絲絨面嘅污迹。
絲絨清潔劑$65（台日）
同樣係清潔絲絨座椅嘅專用清潔劑，具有除菌效能，更可以用嚟清潔地氈、門邊絲絨甚至中控台表面，內附硬毛刷及海綿。
噴霧式清潔劑$48（台日）
放入車廂打開後會噴出白煙，之後關門關窗焗約30分鐘，繼而再開大冷氣嘅風量，就可以去除車廂內及冷氣系統嘅霉味。
去污打蠟清潔劑$60（金輪）
對付真皮座椅、內櫳必備嘅清潔劑，除可去污外重有打蠟效果，可令真皮座椅表面更閃亮。
地氈清潔劑$68（金輪）
可用於人造纖維、羊毛及尼龍質地嘅地氈，噴後待15分鐘後抹乾便可。
台日汽車精品店
地址：旺角黑布街97-99A地下
電話：23924244
金輪汽車音響精品公司
地址：旺角山東街80號地下
電話：27704799
洗車屋年三十
加班洗車
身嬌肉貴或者懶到出汁唔想自己洗車嘅車主，可以去布滿港九嘅洗車屋搵人待勞，最平幾十蚊就可以令車身乾淨晒。不過呢類洗車屋歲晚特別旺場，而且初一至初二都唔會開工，要預早攞車去洗。另外有唔少洗車屋會喺年三十晚開夜少少，車主們可以把握新年前最後時機，洗車迎新歲。
nti快速汽車護理
地址：觀塘創業街34號地下
電話：23452193
營業時間：9:00am-9:00pm（年廿八延長營業時間至10:30pm，年廿九及三十12:00mn。初一至初三休息）
收費：$80（PlanB電腦洗車服務，包括泡泡浴、輪圈清潔、水蠟、清潔車身及車廂內玻璃）
電腦洗車屋
地址：九龍灣啟祥道9號信和工商中心地下7號
電話：27553001
營業時間：9:00am-8:30pm（年廿八營業至10:30pm，年廿九、三十12:30am，初一至初三休息）
收費：洗車兼美容，一般房車$98（年三十$138）、MPV或大型轎車$138（年三十$178）
挑戰者汽車美容
地址：金鐘太古廣場停車場LG1
電話：25089222
營業時間：8:30am-10:00pm（新年營業時間未定）
收費：一般洗車$80，車廂清潔及吸塵$80。
卡士高級汽車美容
地址：鑽石山荷里活廣場B1
電話：24890311
營業時間：11:00am-8:30pm（年三十晚提早6:00pm關門，初一至初三休息）
收費：洗車美容$80，車廂清潔及吸塵$60。
