佘詩曼去年主演的無綫劇《金枝慾孽》大受歡迎，劇中六宮佳麗為爭寵鬥得難分難解，反映現今社會爭鬥的劇情，令觀眾看得甚有共鳴。雖然阿佘過往曾多次表示電視台花旦之間的競爭非如《金》劇般誇張，但她承認彼此確存競爭，更有人搞小圈子。
問阿佘電視台裏是否有人搞小圈子？她說：「小圈子就一定有嘅，冇法啦，呢啲係人類天性，每個人有自己嘅朋友，可以自己選擇去結交，唔埋堆當然會少啲朋友，睇自己點取捨囉，有啲人唔介意，會好獨立、比較我行我素；有啲人又大情大性，冇乜所謂嘅。」
阿佘表示在電視台裏不乏朋友，但真正的知心友卻得郭羨妮一個，她說：「傾到心事嘅朋友一定唔多，玩得埋、可以相處開心嘅就可以好多。」問阿佘是否覺得在圈裏難覓知心友？她說：「係呀，因為自己試過俾人出賣，會驚㗎！」
阿佘透露當年出賣她的人是台裏的花旦，時至今天，對方依然在圈內打滾，阿佘說：「件事都過咗好耐，可以話當時我有啲俾佢利用做宣傳，嗰時我只係唔知點解佢要咁做，係十萬個為甚麼！我唔可以相信，我哋一齊玩、一齊燒嘢食，又上去佢屋企。發生咗一啲事之後，都唔使再同佢了解，因為成件事已經好明，我哋嘅友誼從此就冇咗，所以我唔想再一次被出賣，唔想再一次受傷害，因為真係好驚！以後就小心啲，保護自己，但其實呢啲事喺社會上嘅每個角落都發生緊，呢啲情況都好正常。」
年前阿佘拍攝《帝女花》一劇後，與被傳鬧不和的郭羨妮竟變成死黨，郭羨妮更是阿佘在圈中的最真心朋友，阿佘說：「郭羨妮知我最多秘密，佢畀我嘅感覺好真，其實我哋兩個嘅性格幾似，好直囉！佢可以畀到我好信任嘅感覺。拍《帝女花》時話我哋不和，嗰時我根本未識佢，一句嘢都未講過，但我哋兩個都好願意踏出第一步，化解咗呢啲嘢，傾偈時都係講不可告人嘅秘密呀，哈哈！」
佘詩曼連續兩年在無綫台慶頒獎禮大熱倒灶，談及兩逢滑鐵盧，阿佘淡然說：「今年嘅失敗係出年嘅推動力，喺台慶嗰段時間係幾難過㗎，邊個唔想攞獎呀？但獎得一個，總有人開心、有人唔開心。」
阿佘續說：「喺頒獎禮前，心情少不免有啲緊張，要話畀自己聽放鬆啲，唔好睇得咁重，唔好因為一個頒獎禮先至拍好個劇，你要為拍好劇而拍，頒獎禮只不過係一個藝人一年付出嘅鼓勵，有頒獎禮係會令人進步，令人成長。」
電視台裏有不少人都曾稱阿佘入行多年，又是公司包薪藝員，論排隊都應該輪到她攞獎，阿佘說：「我聽過好多人咁講，但我希望攞個獎係實至名歸，唔係話要排隊至輪到我。」
採訪：朱倬誼
攝影：何國豪
服裝：SistyrMoon
