擔綱演出大河古裝劇《義經》嘅十九歲日本人氣女星上戶彩，現時手頭上擁有十六張廣告合約，係新一代嘅廣告小天后。但近日有報道指彩妹係一個日本宗教組織嘅會員，搞到原本諗住搵彩妹拍廣告嘅日本和民居酒屋集團要另覓人選。
據日本報章《Naispo》報道，有一位廣告業內人士爆料，指日本和民居酒屋集團原本有意喺四月搵彩妹擔任佢哋嘅廣告代言人，不過就因為睇過日本雜誌《周刊新潮》刊登嘅一篇報道而打消念頭。嗰篇係關於日本政治宗教組織「創價學會」嘅報道，該會會長池田喺一個會員聚會上，公開叫啲會員記得睇《義經》，因為該劇演員瀧澤秀明、彩妹同石原佐美都係「創價學會」嘅會員。有傳居酒屋集團係因為怕被認為同呢個宗教團體有聯繫，所以唔搵彩妹拍廣告。
記者向彩妹所屬事務所查詢，佢哋承認居酒屋方面搵過佢哋傾談廣告合約，但就唔肯透露傾唔成嘅原因。
另外，彩妹為咗宣傳噚晚喺日本播出嘅特備單元劇《古都》，前日出席咗個記者會，重即席表演茶道。彩妹喺呢套劇入面會一人分飾兩角，扮演一對命運同際遇迥異嘅孖生姊妹。女星山口百惠亦曾經演過呢個角色，不過彩妹就話唔擔心同前輩比較喎。