沙田馬場噚日上演香港大學校友會挑戰盃，馬場廂房頓成政府總部局長樓，事關唔少高官都係港大舊生，八方噚日喺馬場就見到廖秀冬、馬時亨、葉澍堃等局長，重有數都數唔晒咁多商界大員。班高官平日可能工作繁重，對賽馬呢種運動似乎唔多熟悉，冬冬更話連3T都未聽過，問馬時亨攞貼士，馬仔又畀山埃佢。馬仔話佢都係聽人講，不過輸錢畀馬會都係當做善事，庫房亦有博彩稅收，一舉兩得啦，而為免再俾人鬧佢專畀山埃貼士，佢話已委託葉澍堃做校友會「投注主任」，事關葉澍堃係馬主，應該有多啲堅料啩。
校長徐立之身為主人家，亦要玩番兩手，八方問佢有乜心水，佢竟然拎張六合彩飛出嚟，話自己唔識買馬，買咗張六合彩頂檔！不過，年廿九嘅六合彩頭獎有成七千三百萬，贏咗就重和味啦！
港大新聞及傳播研究中心客座教授龍應台噚日亦有到場見識吓，八方問候佢早前喺廣州被打荷包一事，龍教授話新年快到，舊年啲唔好嘅事唔好再提嘞，至於馬英九被拒來港一事，一提起佢仍然對港府有啲不滿，尤其係保安局局長李少光嘅言論，龍教授話會再邀請小馬哥四月來港，希望屆時港府同北京唔好阻頭阻勢，但佢先旨聲明，小馬哥講明四月台北市議會復會，佢可能非常唔得閒，今次咁快搵定落台階，四月之行似乎唔多樂觀喎！
（圖）港大校友會挑戰盃，徐立之（左）、龍應台（左五）同一眾高官校友齊齊捧場。
傳真︰2623-9278
電郵︰