蘇永康日前俾本報記者影到佢同音樂才女黃丹儀手拖手漫步，噚日康仔透過經理人公司陳小姐否認戀情，康仔話同丹儀識咗十幾年，佢喺第一個演唱會已經搵丹儀幫手彈琴。當日自己只係有少少醉意，丹儀係禮貌上扶佢走，又強調認識丹儀嘅男友。不過記者當晚明明見到康仔先拖住丹儀隻手，咁樣扶人馮仁昭都係第一次見，而且康仔話醉到要人扶，重走去揸車？如果係咁重離譜，唔顧自己，都顧吓人哋安全吖﹗
咁啱馮仁昭前晚喺中環擺花街又撞到曾經同康仔傳緋聞嘅Monique（歐綺霞），佢同一個男性朋友行先，兩個女性朋友緊隨其後，Monique見有人影相即時發惡話：「做乜影我相呀？」個男性朋友亦彈開九丈遠。雖然康仔有新戀情，但似乎Monique亦不愁寂寞喎！
而Monique噚日又同黃宗澤去咗一個商場度做騷，佢話同康仔已經好少聯絡，但係話會打畀康仔問吓佢呢件事係咪真，如果係真嘅都會恭喜佢，Monique話：「康仔好細心，好多女仔對佢都冇戒心，所以佢追女仔都唔係靠個樣！」
羅慧娟噚日去咗旺角，出席一間珠寶店舉行嘅頒獎儀式，佢話擔任珠寶店代言人嘅好處係可以免費佩戴新款嘅首飾喎，而佢又話自己比較鍾意一啲款式比較簡單嘅珠寶。
何韻詩前晚去商台節目《架勢堂》度做嘉賓，堪輿學家蘇民峰話阿詩會喺○六、○七年大紅，不過子女緣就比較弱。阿詩話最信係自己嘅一雙手，所以佢好少問運程，淨係喺九七年同朋友去過廟街睇相。另外，阿詩又透露日前拍廣告時不停跳咗六個鐘，搞到𠵱家行路都要助手扶。
王賢誌噚日到將軍澳出席活動，佢話四月底會第三度舉行二手衫慈善義賣，亦係佢最後一次做搞手，佢話對上一次搞已經係三年前，因為每次搞義賣都花唔少時間。𠵱家有唔少好友執咗好多衫畀佢，好似有吳君如、莫文蔚等等，王賢誌話除咗將部份收入捐畀東華外，可能會捐啲畀南亞災民。
香港影評人協會第十屆金紫荊獎日前公布咗提名名單，噚日影評人協會又公布今屆嘅終身成就獎會頒畀劉家良師傅。
今年七十歲嘅劉師傅，喺影圈工作近半個世紀，參演超過一百多部電影，而大部份都係武打片，對宣揚中國傳統武德同武術都有好大嘅貢獻。
鄭裕玲日前接受港台節目訪問，分享佢嘅電影生涯。嘟嘟話入行三十年，拍咗近六十部戲，但係可能自己奄尖，至今都冇一部令佢滿意。問佢如果王家衞搵佢拍一部要拍五年嘅戲，佢會唔會考慮？嘟嘟話：「十年都冇所謂，但係要同佢簽合約，講明最少起碼要出我拍嘅80%戲份。」
