岑寶桂（桂姐）出版新書，易卜2005國際流年大預測，叫做《雞年問阿桂》，啱啱出版，在各大書報攤有售，左丁山第一時間攞嚟睇，睇吓桂姐有乜指示先。
傳統上，民間流行一句話，年廿八，洗邋遢，今日係二月六號，剛好係年廿八，究竟如何洗邋遢呢？桂姐話洗邋遢應於新年之前一晚做，即是年卅晚，預備小桔一對、碌柚葉及黃皮葉各一枝，葉尾部份撕開少許（《雞年問阿桂》一書第五頁有漫畫插圖），將三樣物品紮於花灑龍頭，水花沖過碌柚葉小桔黃皮葉之後，射往身上，由頭到腳，咁就可以沖走一年積下之衰氣。幾時沖涼最適合呀？桂姐建議要在子時（晚上十一時至翌晨一時）之前，即係晚上食完飯，執好間屋啲雜物，齊齊整整之後，十點零就入沖涼房沖洗邋遢。踏入子時已經係年初一，子時係吉時，桂姐話要迎財神喎。點樣迎？請睇《雞年問阿桂》第六、第七頁，便知詳情。
桂姐話乙酉流年恒指走勢：大市資金充裕，交投暢旺，走勢反覆，有時候風高浪急。真言係：春季起波浪，入夏見漩渦，初秋新景象，中秋宜留神，入冬不莽撞。
地產走勢：方向不明顯，處處地雷，表面興旺。
黃金走勢：價格回順回軟。
美元走勢：頹勢喘定，緩緩向上微調。
杜瓊斯指數走勢：上半年較好，下半年調整，全年升幅甚窄。
董先生流年：急需補飛，奈何身邊無人，今日時勢講teamwork，奈何特首撞着個team唔work。
政黨領袖流年：馬力病情有變，望多多保重；田北俊流年旺相，不怕挑剔！