我認，我老土，總覺新年無行過花市，就好似着鞋唔着襪，硬係有少少周身唔聚財咁，所以，一等到全深圳最大型年宵市場開幕當日，老遠都要北上湊熱鬧，拍住大班同胞逼入近800個攤檔，爭買最新最潮兼最騎呢的雞年精品玩意，再順道落東門迷你花市，唔掃翻版改買字畫，過番個豐收新年。
記者：尹天仇 攝影：陳陶陶
模特兒：Katie、Ken（d8）
逾八百攤檔霸佔半條街
香港最大型花市是維園年宵市場，深圳方面則有愛國路的「迎春花市」做代表，花市規模大，係咁意封半條街已經容納近800個攤檔，其中乾貨和濕貨各佔一半，要認真睇晒所有貨品，三兩粒鐘走唔甩，遺憾近日香港俾小小紅火蟻搞到滿城風雨，即使見年花開得幾咁燦爛都係得個睇字，好彩乾貨嗰邊都重有大把選擇，買唔成年花都重有騎呢精品揀。回顧番開市當日，老土少少都要用人山人海來形容，開頭勁驚人多治安差的Katie同大口Ken，臨尾都大讚遊人守禮有秩序，兩人更同聲話最正係可以盡情講價，同巴辣檔主交手都不知幾咁過癮，起碼唔似得喺香港會俾人白眼喎！
深圳花市有幾墟冚？
必蒲攤檔
麻雀咕𠱸最應景（檔號：E064）
話之你係水魚定高手，新正頭難免都會打番幾圈，建議開枱前買定呢幾個繡有「中發白」的麻雀咕𠱸，質料夠晒軟綿綿，用來墊住背脊打麻雀，坐得舒服自然精神爽利，旗開得勝，
?28。
懷舊鐵皮飛雞（檔號：H081）
啱大人儲多過細路玩的鐵皮公雞，人手上下拉動可做出雙翼齊飛動作，係就係Low-tech咗少少，但反而咁先有份懷舊味道喎，至少比起其他公雞毛公仔特別得多，屬送禮自用最佳恩物，
?8。
飛甩雞毛（檔號：G064）
再來懷舊玩意，人手製造的雞毛毽，經大口Ken測試，證實彈力不俗，但切記踢還踢，千祈唔好咁大力，事關雞毛同毽身齋靠支飲管連埋，用力過度盞雞毛都飛甩埋，
?5。
盞鬼小福雞（檔號：G039）
環顧全花市過十款毛公仔，呢隻小福雞算最有新年Feel，身穿紅噹噹唐裝衫，PatPat底下有幾隻蛋，再加埋圓渾外形有福相，最適合做睡房的賀年裝飾品，?30。
霹靂無敵大風車（檔號：H096）
叫得做霹靂無敵，當然要夠大喇！呢個雙色風車直徑有成25吋，塑膠做，擺足成年唔怕殘，至於何解要買個最大？梗係想轉個大運啦，故圖中大風車已成本人囊中物，?40。
脹爆大眼雞（檔號：大眼雞E025、小雞棒H099）
美少女Katie出名眼仔睩睩夠精靈，但今勻北上即遇強勁對手，佢叫大眼雞（左?15），吹氣玩意也，Katie應慶幸自己唔似佢，另外騎呢小雞棒（?20）則勝在外形Cutie夠大路。
只此一家黑玫瑰（檔號：B181）
唔買年花，可取而代之買永不凋謝、絕無紅火蟻的紙藝花！花瓣由縐紙製成，種類有黑玫瑰、鬱金香、蘭花等，乃店主自己的手作仔，只此一家夠矜貴，各售
?10至
?30。
三不像怪雞（檔號：H092）
「鴕鳥？雞？唔會係鴨啩？」呢隻搞到Katie同大口Ken諗爆頭的物體，姑且叫佢做「怪雞」，事關勁到連檔主自己都唔知係乜，淨係知佢識呱呱叫，論騎呢睇怕佢都係冠軍，
?25。
翻版天堂搞書香年宵
東門，出名翻版天堂，今日去東門當然唔係掃老翻，事關喺步行區思月書院門外，剛剛開設咗個迷你年宵市場。講攤檔數目，雖然拍馬都追唔上愛國路的「迎春花市」，但勝在攤檔中十檔有八檔專賣字畫揮春，比迎春花市少一份銅錢味，有時間順道一遊，買幅即席手寫揮春返屋企。
醫肚站
深圳愛國路幾乎有成條彌敦道咁長，酒樓食肆多的是，唔想行咁遠，近近哋走到花市對面就已經有間四川菜館可以醫肚，菜式選擇多，價錢更貫徹國內平靚正作風，大大碟都係二三十蚊，幾個人Share最實惠。
巴蜀風
電話：（86）755-25680388
地址：深圳羅湖區愛國路34號
交通
1.深圳市迎春花市
羅湖火車站乘的士前往愛國路，可着司機直接開往花市門口落車，車費約?20。
開市日期及時間：即日至年三十，中午12時至晚上12時
2.東門迷你年宵市場
由愛國路乘的士前往東門，車費約?15，到達後朝步行區KFC的方向，即可見隔壁的思月書院。
開市日期及時間：即日至年三十，上午10時至晚上8時
3.深圳地鐵
由東門回程返羅湖火車站，可直接乘搭新近通車的深圳地鐵，由老街站（東門）往羅湖，每程僅?2，過程比剛通車順暢，一致讚好。
