我哋係點樣去選擇睇一部電影？相對於去買一樣產品，要揀睇一部電影的確有啲困難。要買一樣產品有一般常用嘅模式，排除必需品同特別有吸引力嘅奢侈品之後，通常都係睇嗰一樣產品嘅價錢抵唔抵用，了解咗係咪最新產品，再睇吓做工如何，最後睇埋售貨員嘅服務態度和售後服務如何。咁就應該差唔多可以畀錢買。
根據以上嘅一般模式，電影好明顯唔係必需品啦，就算係奢侈品都唔見得經常擁有特別吸引力，有啲戲佢上映完你都唔知，咁你話有冇吸引力？
價錢統一，一套拍一億同拍二百萬嘅戲都係收你五十蚊，所以大部份人都會揀拍一億嗰套戲睇，變成部份宣傳人員開始「老作」製作成本，明明拍二百萬就話拍四百萬，拍一千萬就話拍二千。
係咪新產品就見仁見智，形式一樣，裏面梗係有你愛我，我愛你；你打我，我打你；你憎我，我憎你。但係次次都梗係有啲嘢唔同，可能係演員組合，可能係拍攝手法。如果我新到拍套「逃出太空」，我估你都唔敢睇啦，不過大家唔使驚，我未諗到太空外面係乜嘢。所以係咪有新嘢對電影嚟講其實唔係最重要。
做工就真係要睇過至知，我唔相信一部戲會純粹因為拍得好靚，或者係啲音響效果好勁，又或者係隻主題曲好聽就會好賣座，我覺得呢啲已經係基本要求。一個觀眾睇完一部戲會推薦叫朋友睇大部份都係講內容。
售貨員嘅態度就真係好難講，有啲只會攞佢自己鍾意嘅嘢畀你睇，有啲驚你唔鍾意就不停畀唔同嘅嘢你睇，有啲要你等好耐，有啲就你呢樣都未睇完，佢轉頭又已經有另一樣。售後服務係冇，純粹心靈滿足，如果有投訴，分分鐘媽你話你唔識嘢，所以下次唔好再幫襯呢個售貨員。