煲碟王：<br>星級配音陣容雜錦海鮮爆笑點化你

煲碟王：
星級配音陣容雜錦海鮮爆笑點化你

《超人特工隊》啱啱喺香港上畫，人氣Hit到爆，負責製作嘅彼思動畫紅到夠膽踢開迪士尼，快將拋個身出嚟搵食，個個Director發到豬頭咁。其死對頭夢工場幾度力抗失敗，得套《史力加》單天保至尊，居然重敢翻炒對手最成功嘅《海底奇兵》橋，以《鯊膽大話王》挑戰王者地位。珠玉在前，個個先入為主真係難有好成績，抱住一看無妨心態睇其DVD；一堆荷李活明星生鬼配音，同埋密集式笑位，反而有驚喜喎！

記者：徐影龍

睇番《海底奇兵》嘅成功，並非單單票房上嘅輝煌紀錄，重帶起一股養熱帶魚嘅潮流，小丑魚同藍吊真係多得佢唔少。後來者《鯊膽大話王》要鍊低佢，唯一優勢係睇住嚟打，針對其弱點而出擊；前者畫功細緻人物生動，後者就做得更靚更生動；前者大橋係千里尋親，後者就加入更多人性嘅表達，拋出一堆教你做人嘅道理；你套戲有笑位，我更要比你多10倍！

■論3D動畫技術，夢工場一啲都唔輸蝕畀《海底奇兵》。

■喺海底賣Sashimi拍晒烏蠅，真係笑爆肚！

■主角財迷心竅夢想發達，孤注一擲喺「跑海馬」度。

明星配音角色神似

未講劇情寓意前，先講吓英文版強大嘅配音陣容；教父、黑超特警、BJ、羅拉等頂級大星齊齊出聲力撐不特止，重做埋3D掃描，將容貌結合喺動畫角色身上，所有表情、小動作統統喺《鯊膽大話王》內重現，睇片已知到係邊個配音。就以主角奧斯卡為例（韋史密夫配），片內充滿黑人HipHop做手，不停搖身搖勢猛問人「What'sup？」，重要教人正確應該係點樣「Yo！」，將一個市井小人物表現得相當之生動，頻頻撞板，好幾個位實在笑到肚痛，令全片生色不少！
雖然鯊魚老大多連勞（羅拔迪尼路配）出場唔多，不過講黑幫老大教仔、發嬲等演繹得好「羅拔Feel」，不愧第一代教父！相反BJ雲妮絲穎嘉同盜墓者安芝蓮娜祖莉就表現平平，最搶眼仍係其招牌「膶腸唇」！3區DVD重收錄埋森美同秦沛嘅配音，小朋友聽中文都識得笑。

■羅拔迪尼路聲演鯊魚幫頭領，戲內角色倒有幾分相似。

■韋史密夫化身市井小混混，相當之爆笑。

■安芝蓮娜祖莉性感聲線不及紅唇搶眼。

說教味重細路未必明

故事講魚毛仔奧斯卡生活喺礁城，幹着清潔鯨魚之低下工作，一次偶然機會，俾人誤會殺死鯊魚而揚名立萬。成為英雄後財源滾滾，過住奢華嘅富豪生活，最後不忘共患難嘅女友，自揭謊話兼跟鯊魚幫冰釋前嫌，嚟個完美嘅大團圓結局，要幾老土有幾老土。戲內重有寓及力爭上游、賭博禍害、貪慕虛榮等語重心長嘅劇情，筆者女友就覺得故事牽強小朋友未必睇得明，計我話唔明並非劇情深奧，而係影片太過出力描述成為萬人迷，而被有錢、有女、有朋友嘅風光所蒙蔽，其他做人道理肯定睇唔入腦。你睇吓《殘酷一叮》嘅參賽者，就知時下小朋友有幾「力爭上游」喇！

■鯊魚父子和好如初，重點係教人溝通之道。

■名貴嘅珍珠都係由一粒沙做成，好有寓意呀！

■放棄名利搵番意中人，例牌嘅大團圓結局。

附加內容夠豐富

話晒《鯊膽大話王》都係夢工場一級製作，港票房雖平平無奇，可幸港版3區DVD做得唔錯，附加內容相當之抵食夾大件；彼思動畫好興喺結尾加播刻意經營嘅搞笑NG片段，而夢工場嘅《鯊膽大話王》就改為勁歌熱舞，由魚毛仔奧斯卡帶頭玩HipHop，跟住所有角色陸續出場齊齊跳，熱鬧得嚟不失令人會心微笑嘅精采，呢段片有成幾分鐘長，電影上畫時係Cut咗㗎，值得留意！

■戲內充滿音樂同生鬼歌舞，務求比《海底奇兵》更有娛樂性。

■擺隻碟落電腦個DVDROM度，重可Print埋PostCard、T恤印花等玩意。

■收錄咗夢工場快將上畫嘅《Madagascar》預告片，又係勁搞笑片種。

■一眾配音明星輪流講感受，個個都梗係話好有挑戰同好好玩。

■羅拉睇番自己美化不少嘅造型，笑到合唔埋嘴。