早排有周刊報道話白韻琴同無綫𢱑撈，打電話畀無綫揸fit人方逸華，希望同男友謝偉俊取代陳海琪做《香港直播》主持，由於白姐姐喺新城電台做嘅時候，已經同《香》嘅現任主持陳海琪唔妥，所以有傳話白姐姐今次係針對海琪。
雖然《香港直播》改革後，收視同口碑愈嚟愈好，無綫亦否認要調走海琪，但馮仁昭噚日收到風，海琪只係做到今個月底。
究竟海琪走咗之後，係咪真係由白姐姐同佢Honey謝偉俊拍住上，真係要等到下集大結局分解！
許志安繼早前練泰拳整傷手之後，噚日佢去商台做訪問，又話排舞時唔小心撞傷右眼角。安仔話本來邀請黃伊汶喺佢演唱會入面跳一part好大膽嘅舞，但安仔怕會影響對方形象而改用舞蹈員，到時十個舞蹈員要着T-back同三點式演出。
余文樂噚日去咗商台接受訪問，佢提到讀書時嘅傷心事，話說有日佢去女友屋企，發現有對男裝鞋，重見到第三者㖭，嗰刻佢腦袋一片空白，之後就粒聲唔出走咗。
阿樂話呢件事對佢影響好大，搞到𠵱家拍拖疑心好重，佢重表明為咗想多啲同女友見面，希望他日有個「跟得女友」。
葉璇噚日喺將軍澳電視廣播城化身為拉丁舞女郎，佢話雖然細個開始學跳舞，但就未學過拉丁舞。田亮早排被逐出國家跳水隊，問葉璇有冇打電話去安慰對方，佢話：「都有同佢聯絡，佢好堅強，總之專心跳水喇，做朋友一定支持佢，希望佢可以再跳出好成績。」
李克勤噚日擔任商台節目嘉賓，問到佢婚期時，佢就話結唔結得成婚就要睇劉德華喎，因為華仔負責做伴郎。克勤重講笑話臨近新年，都見華仔成日做嘢，所以佢怕自己到○八年先結得成婚。克勤又話已經send咗短訊畀阿姐汪明荃慰問羅家英。
趙薇噚日喺上海宣傳電影《情人結》，有影迷問趙薇情人節點過，趙薇即半開玩笑咁話：「你是我甚麼影迷啊，居然提這樣的問題，肯定是要和情人嘍。」記者追問佢情人係邊個，趙薇點都唔肯講。今次係佢第一次承認有情人，唔知佢口中嘅情人係咪內地海協會會長汪道涵個仔汪雨呢？
林百欣𠵱家住喺瑪麗醫院，唔少記者知佢身體唔多妥，都去咗醫院等佢，林建岳唔想記者騷擾，噚日佢專誠對外公開爸爸嘅病情，佢話林伯只係去醫院做磁力共振，檢查之後發現有膽石，今次只係做小手術，大概一星期左右可以出院。
