各大證券行普遍調高東亞（023）今年盈利預測，支持東亞股價升0.87%至23.30元，但花旗則繼續叫客沽貨兼維持盈利預測不變，主要是因為東亞在國內的貸款增長快，增加壞帳風險。雖然大摩調高東亞今年盈利預測9.5%，主要是基於回撥增加，仍維持其「跑輸大市」評級，大摩重話東亞去年業績好，主要是受惠特殊項目。
市場憧憬中電信集團收購聯通集團GSM網絡，刺激聯通（762）再升4%至6.55元，成交高達3.77億元。不過，聯通噚日終於打破緘默，批評中電信嘅初哥只是一廂情願，聯通冇諗過要賣家當。由此看來，談判氣氛似乎唔多友善，再高追聯通或者有風險。
Cookie話，初哥嘅提議其實唔錯，既可解決聯通擁有兩個網絡的問題，同時可以維持市場上只得4個經營商的局面，日後中央政府只需發3個3G牌，減少惡性競爭。國資委早前只是強調不會將聯通拆骨，但冇話過唔會考慮初哥呢個方案，一旦中央接納呢個方案，相信聯通好大機會要割愛，問題只是價錢而已。
新世界發展（017）與新創建（659）雙雙停牌，據聞與重組港口業務有關，同系冇停牌的新世界中國（917）就升2.76%。
有傳聞新中可能進行私有化，但唔知真定假？早前市場傳過恒基中國（246）會進行私有化，股價踢高後，公司否認其事，結果恒中噚日大跌8.33%至4.95元，成交2260萬元。黑客話，公司傳出私有化，好多時是因為每股資產淨值較股價有大幅拆讓，惹起市場的憧憬，至於會否落實私有化，好睇大股東或公司本身有冇現金，新世界系需要減債，應該與私有化無緣。
阿虎