早陣子網上訛傳日韓兩地有天災，搞到人人有假期都無膽飛，之但係農曆新年流流長，唔通真係屈喺屋企等人嚟拜年咩！想近近哋過番個熱鬧新春，去澳門度歲絕對係GoodFit選擇，巡遊贈興、睇表演、拜媽祖等活動多到數唔晒，街頭巷尾又有大型公雞布置等住同你拜年，最正係可以大模廝樣咁放爆竹煙花，怕就怕你一日都未必玩得晒。
記者：尹珊珊
攝影：陳陶鈞
模特兒：Katie、James（StarAsia）
燃放爆竹玩通頂
講到玩爆竹，肥仔攝影師即時回憶起小時將爆竹放在牛屎上的趣事，雖然玩法係核突咗少少，但點都叫做美好回憶。香港N年前已經禁止放爆竹，好彩，重可以到澳門的爆竹燃放區，大模廝樣放個夠本。
最大型燃放區喺觀音像附近，開放期間，遊人可以喺臨時搭建的12間紅色小屋內，買到爆竹同「鑽地龍」、「龍吐珠」等小型煙花，跟手再走到隔鄰嘅海旁空地發放，諗落已經開心到爆。天黑放小型煙花先有氣氛，好彩燃放區開放時間直達凌晨，玩到叭叭聲都唔怕俾人投訴啦！
爆竹燃放區開放時間
2月8日中午12時至翌日凌晨2時
2月9日至13日上午10時至翌日凌晨2時
地點：澳門孫逸仙大馬路（觀音像附近）、氹仔史伯泰海軍將軍馬路海旁。
澳門街頭多雞布置
咪心邪，呢個捉雞指南，講緊係澳門街頭的大型雞年布置，澳門政府為營造濃厚熱鬧的新年氣氛，喺呢方面落足心思，無論身處大三巴、議事亭前地、媽閣廟定係喺海旁大道漫步嗰陣，耐唔耐就會見到公雞的影蹤，最正就係每隻都有特別造型，並寫上相關主題的吉祥字句，製作認真又有心，百厭James同Katie梗係爭住撲前影相留念，香港政府想吸引多啲遊客，真係要偷師學吓嘢先得。
年三十晚媽閣廟上頭炷香
每逢年三十晚，香港有唔少善信都會爭住去黃大仙廟上頭炷香，原來喺澳門呢邊，一樣有極多信眾趕住喺年三十晚去媽閣廟拜神祈福，雖然James同Katie稱唔上好神心的善男信女，但都本住入鄉隨俗的精神，去媽閣廟上番炷香。聽廟內哥仔講，上香其實喺新年邊日都無所謂，最緊要有Heart，用香燭做祭品已足夠，佢重提醒我哋記住喺廟外的攤檔買個風車轉轉運，保佑來年事事順境喎！
售賣神香及風車攤檔開放時間：
2月8日（年三十）晚上8時至翌日下午6時
2月9日（年初一）至15日（年初七）上午9時至下午6時
地點：澳門媽閣廟前地海旁
趁墟巡遊人多夠熱鬧
新年唔熱鬧又點有氣氛？咁喺年初一、二，澳門邊度會最墟冚？答案就係議事亭前地、媽閣廟前地、大三巴，同埋氹仔嗰邊的官也街同龍環葡韻，事關以上地點會舉行大型巡遊活動，到時旅遊大使、十二生肖、財神及福祿壽等，會輪流到各景點向旅客大派利是，部份時段重有舞龍舞獅、燃放鞭炮及三輪車巡遊，唔怕同人迫，不妨夾啱時間Hea吓。
食自助餐睇360度夜景
338米高的澳門旅遊塔係濠江新地標，自然有大堆賀年節目，除了銀樂隊巡遊、舞龍舞獅、財神派利是呢類傳統大路嘢，最精采係年初一至五4:30pm，有一班性感女郎表演肯肯舞，營造火辣熱鬧的氣氛。
玩足全日，都係時候要滿足吓個肚皮，澳門出名美食多，但論個View最有睇頭，莫過於位處塔內61樓的360度旋轉餐廳，餐廳設計會以360度慢速轉動，等大家歎緊自助餐美食的同時，又可以從多角度欣賞到濠江夜景，唔使老遠走去主教山，若然同行咁啱係親密朋友，重正，肯定會俾呢度浪漫到暈嘅氣氛所迷惑。
360o旋轉餐廳
地址：澳門旅遊塔61樓
電話：（853）9888660
收費：2月9日至13日期間
自助午餐成人$168、小童$118
自助晚餐成人$288、小童$198
有用網址：
有關澳門於新年期間舉辦之賀年活動詳情，可參閱以下網址：
澳門旅遊局www.macautourism.com.hk
澳門旅遊塔www.macautower.com.mo