貪污是否好事，好似係張五常寫過，貪污係管制經濟（controlledeconomy）向前發展嘅潤滑劑。在一個管制體系，官僚萬事皆管，做乜都要攞批文，假如係全部由國有企業掌控生產資源嘅話，官對官，自然冇人賄賂，冇人貪污，後果係做又三十六，唔做又三十六，大家鬥拖、鬥等，萬事做唔成，試問經濟如何增長、發展。呢個就係一九七六年或以前嘅中國經濟狀態。
到咗改革開放時期，引入利潤誘因，繼而容許民營企業，賄賂立即應運而生，一方面願畀，一方面願收，中央所訂下嘅規條，因政治理由，難以修改，追唔上時代，企業冇法子跟到足，唔跟就犯法？怎麼辦？畀紅包囉，隻眼開隻眼閉囉。呢個就係中國近二十年來嘅狀態，經濟飛躍發展，貪官盤滿砵滿，民間富豪湧現，挾帶私逃案件日增，中國境外賭場肥過肥豬仔，去年中國GDP增長9.5%，傲視全球。
咁嘅情況能唔能夠持續呢？以中國咁大，咁多人口，繁雜苛刻規例多如牛毛，加上到𠵱家我哋仍然唔知黨大還是法大，預料貪污會繼續蓬勃，經濟繼續前進，直至壟斷性民間企業出現為止。菲律賓最先碰上呢個問題，馬可斯集團式貪污製造了自己友（cronies）大富豪，逐漸霸晒一個國家（小國也）嘅大生意，窒息咗其他非自己友，故此釀成一個怨憤集團（包括私人商家、民主人士、教會、平民）去對抗得益集團（馬可斯與自己友），卒之爆發人民革命，至今政局仍然唔穩定。
中國目前未到馬可斯末期嘅狀況，唔使驚住，中國用嚴打反貪污冇用嘅，加快廢除管制規條，確定法大於黨，中國就會少啲貪污嘞。