立法會西九龍發展小組委員會，噚日開第一次會，大狀黨梁家傑同民主黨涂謹申爭做主席，咁啱得咁蹺，竟然兩個人都得到十三票，搞到要由暫代主席田北俊抽籤決定，最後就由抽中嘅傑哥做主席；阿涂就做副主席。八方問白鴿黨，點解傾唔掂數，佢哋話西九龍係阿涂選區，西九亦係佢睇開，梗係冇得讓。
傑哥成為最先做委員會主席嘅議會新丁，但係佢表現一般，可能因為佢太民主，好多問題要畀大家發表意見，變咗好似冇乜方向咁，長毛重發火大鬧，啲人講嚟講去得三幅被，佢舉咗四十次手要講嘢都冇人睇到。大會最後決定，二十一號開第二次會，到時請班官嚟解畫。
雖然民主派講唔掂數要爭主席，但係搞公投周就相當團結。張超雄話，噚日飯盒會已經分晒工，前綫搞模擬公投、大狀黨就喺佢哋個網上電台宣傳、民主黨就搞展板，如無意外，公投周就喺二月第三個禮拜開始。
傳真︰2623-9278
電郵︰