猴年最後第兩個半交易日，恒指升69點。成份股4大功臣中移動（941）、滙控（005）、聯通（762）與中銀（2388），總共進帳60點，幾乎包辦晒恒指升幅。捉得正4隻重磅股走向，炒恒指窩輪搵錢如探囊取物，不過又有邊個可以準確估中芬佬做嘢意向？
中電信C輪4500：電訊股掂檔，升得最慢嘅係中電信（728），收2.975元，爬升1格咁大把，但啲C輪好生猛，生猛過正股好多，例如2219收19.6仙，飛漲58%，隻輪剩番7日半交易。隻輪已屆末日，溢價0.7%，槓桿率15.2倍，正股未來郁動三兩個巴仙，輪價會有好大波幅。
中電信C輪最旺門嘅係4500，收37.5仙，升9%，10月尾到期，溢價6.1%，槓桿率7.9倍（有效5.1倍），引伸波幅29.2%。炒中電信C輪，呢隻最正路。正股如果郁得緊要，4500升幅比唔上其他槓桿率大嘅C輪，但其他C輪交投太靜，買貨難，甩貨亦唔易。
中芯C輪：中芯（981）再升3仙，收1.66元，C輪彈升，升幅超過18%嘅都有3件，佢哋係3503、3548、3571，全部都係5月下旬至月尾到期，溢價由9.9%至3.5%，槓桿率13.4倍至21.8倍。槓桿率睇落有爆炸力，但睇埋溢價則買唔落手。
正股由10日前低位1.47元上到𠵱家，已升13%，再升有冇動力屬於兩睇，如果牛皮幾日，計埋新年假期，其實係好多日，揸呢3隻輪會輸在溢價收縮。
比較實際嘅對象係3790，8月初夠鐘，輪價22.9仙，溢價7.2%，槓桿率7.2倍（有效4.8倍），引伸波幅36.3%。
章盛