普羅大眾對藝人嘅一舉一動都有份好奇心，若果能夠住喺佢哋隔籬近距離「觀察」，感覺又會點呢？世紀21奇豐張勵山話，西貢彩濤別墅雙號前排屋，剛以2000萬易手，單位2470呎，另附車房，呎價近8100，買家日後就會同藝人成為「左鄰右里」。
皆因汪阿姐（汪明荃），就住喺彩濤嘅前排屋，唔知大家日後有冇機會做埋好朋友呢？而葉國華同曾志偉都係屋苑業主之一。至於隔籬嘅龍湖別墅，李克勤02年就用1200萬買咗座2500呎嘅洋房。
聽講買家住開港島區，一家四口睇咗一個月樓，包括西貢匡湖居同西沙帝琴灣，最後揀咗彩濤別墅，決定入市前都唔知呢度有咁多藝人住喺度。至於原業主喺98年以1111.5萬買入，𠵱家獲利近900萬。
樓市旺，炒家又再伺機出擊，當中不乏師奶兵團。中原盧鏡豪表示，由5、6個師奶組成嘅財團，近期接連入市鴨脷洲海怡半島，專攻300萬以下嘅兩房細單位，剛以247萬購入一座中層640呎單位，呎價3859；之前已動用成千萬買咗3至4伙。
聽講呢班師奶係外區客，喺鰂魚涌康怡花園都有入貨，去年底轉投海怡，貪單位夠平，目標係加一成多出貨喎。
另外，屯門都見師奶兵團蹤影。中原楊俊偉話呢班紅粉兵團最近就以111萬，買咗兩個兆康苑單位，回報預計可達7.5厘。
物業管理公司近年紛紛北上拓商機，新昌集團更銳意喺內地大展拳腳，同北京金融街物業管理合組嘅公司，最近就攞到北京西環廣場嘅物業同設施管理權。
西環廣場位於西城區，被視為北京新地標，設有商場、寫字樓同超過2000個車位，係當地嘅交通交滙中心。項目總面積近280萬呎，預期年中落成。
新昌喺本港除咗管理居屋出晒名外，最近又攞到馬會、愛護動物協會、文化博物館同房委會總部（第3、4座）嘅管理合約㖭。
年近歲晚，商場宣傳攻勢鋪天蓋地，變身「i蒲」之後嘅旺角始創中心商場，大賣年輕人概念。蘭西噚日收到佢哋嘅應節禮品包，夠晒創意同前衞，例如好得意嘅豆袋年曆、幾款唔同卡通人物嘅揮春，連利是封嘅對聯都有埋「始創」兩個字（圖六），大業主九建宣傳得嚟又唔覺「硬銷」。
講開揮春，富城集團嘅「富貴吉祥．城興市旺」，都一樣以「富城」行頭，順手宣傳吓公司。
遠東發展邱氏家族，據聞正低調委託高力國際，暗標賣荃灣油柑頭嘅收租豪宅屋苑，意向價大約億半，呎價4000蚊左右，3月11日截標。
個項目喺悠麗路八號，叫錦柏豪苑，4年樓，有16間2400呎嘅海景別墅，大部份重有租約，平均租緊兩萬蚊一幢，回報兩厘幾。曾經有基金睇過，市場亦有買家洽購緊，邱生索性做暗標，價高者得。
趁個市重幾旺，樓面地價郁吓都三、四千蚊呎，錦柏豪苑價錢算合理，應該唔難賣。
利嘉閣舊年因為代理恒基樓盤成績出色，日前獲四叔李兆基親自頒發金牌以示獎勵，其中代理西灣河嘉亨灣更贏晒全行，攞到恒基嘅30萬獎金。
噚日利記又有錢收，喺長實手上接過張100萬嘅支票，原來係早前促成紅磡海逸豪園「海逸皇宮」單位嘅佣，個單位成交價約6800萬。若果保持到呢個氣勢，睇嚟利記後勤今年出多5個月花紅嘅機會愈嚟愈高。
電郵地址：
