憑《Ray》一片首度角逐金像影帝嘅占美霍士（JamieFoxx），近排人逢喜事精神爽，前日佢獲邀上去名嘴JayLeno嘅節目度接受訪問時，不單止開心到跳舞，佢重話近日事業起飛，真係光宗耀祖咯！
占美前日一身西裝打扮，喺加州接受名嘴JayLeno訪問，當日占美講番佢今年分別憑《Ray》及《Collateral同行殺機》角逐金像影帝同最佳男配角嘅感受，成晚好似隻開籠雀嘅占美不但即席跳舞，重學Prince唱歌，搞到名嘴笑到停唔到口。
占美當日重帶埋佢家鄉德州小鎮嘅一份報紙，佢話佢家人由細到大都係睇嗰份報紙，早排喺金球獎頒獎禮前夕，佢張相首次登上頭版，雖然只係一個小角落，但都足以令佢覺得光宗耀祖。另外，占美前日重喺一架用作慈善拍賣嘅電單車度簽名，成為最後一個簽名嘅藝人，架車原來喺eBay俾一位善長以約六百二十四萬港元投得。
另外，占美喺電影《Ray》度將RayCharles演得出神入化，但RayCharles現年四十五歲嘅仔RayCharlesJr.，日前俾洛杉磯警方拘捕，因為佢涉嫌喺酒店度吸毒同藏毒，現時RayCharlesJr.正以約八千蚊港紙擔保外出，警方暫時未落案起訴。
圖片：路透社