老董俾胡主席當面訓斥後，成個食懵咗咁，竟然自找麻煩，喺施政報告中大叫口號，話要「堅決反對官商勾結」同「徹底杜絕利益輸送」，煲呔重將數碼港呢堆掃咗入地氈底嘅醜事主動攞番出嚟講，想話一次過洗底，費事成日俾人攞住嚟做話柄，結果就愈描愈黑。
梗係啦，你叫個唔知頭唔知尾嘅鬍鬚曾出嚟打頭陣，一定死梗，白紙黑字寫兩篇文章，當中有老屈民主派議員舉手贊成畀小小超起數碼港之嫌；更搞錯佢哋當日其實從冇機會否決過地產商建議分拆地皮出售之實，因為政府已經自己拍咗板，冇畀議員投票。
鬍鬚曾講咁多嘢，連櫃桶底嗰二十份文件都抬埋上台，就係想話啲官員已做盡，所以當年負責官員鄺神童都冇嘢好補充，但係大家都會問嗰關鍵十五日，即係小小超李澤楷跟住老董去以色列之後，究竟發生咗乜嘢事？咁快就將個數碼港雙手送咗畀小小超，係唔係老董落嘅聖旨，不可不從呢？
有陰謀論者就話呢單嘢係煲呔為咗洗底。唉，老董冇能係人都知，唔係點會劑劑都咁撞板，但係會唔會因為數碼港令到北京唔敢揀商界背景嘅人做特首就好難講。反正白鴿黨已經準備喺年初十政務司司長答問大會上跟進呢單嘢，睇吓煲呔點拆招。
官商勾結愈玩愈高興，連老董護法胡應湘爵士都加入戰圈，話佢喺灣仔船街個酒店項目正係官商勾結嘅受害者，八方正想大讚佢猛料之際，胡爵士噚日忽然縮沙，重自刮幾巴，話一早講咗冇證據，估唔到自己嘅言論會喺社會引起咁大迴響，又話大部份公務員係奉公守法，咁講對佢哋唔公平喎。
香港真係愈搞愈荒謬，以胡爵士咁重磅，你話邊個可以鍊住佢條頸叫佢馬上收聲，梗係高官啦！講到尾，生意人點會同官鬥呀，勾結「合作」就有之。
傳真︰2623-9278
電郵︰