風靡全日本嘅愛情片《在世界中心呼喚愛》曾經打動唔少日本男女，套片雖然本月十七號先正式喺本地上映，但十四號情人節當晚就會上映優先場，等有情人一齊度過浪漫佳節。
《在世界中心呼喚愛》由日本人氣女星柴崎幸同大澤隆夫主演，講述童年時為咗大澤而被車跛腳嘅柴崎幸，雖然已經同大澤結婚，但大澤仍然唔能夠忘記中學時患上絕症而死嘅情人，最後柴崎幸同大澤去到「世界中心」，畀佢完成心願。喺片中扮演大澤舊情人嘅人氣靚女新人長澤雅美同扮演年輕大澤嘅森山未來，就憑《在》片一炮而紅，日前重雙雙攞埋藍絲帶最佳女配角同男新人獎㖭。
《在》片喺日本上映以來口碑同票房俱佳，電影喺當地公映四個月，票房收入已超越八十億日圓（約六億港元），打破九七年《失樂園》創下嘅票房紀錄，成為日本史上最賣座嘅日本愛情片。
同時，套片亦為日本帶來「世界中」熱潮，《在世界中心呼喚愛》嘅原著小說就賣出三百二十一萬本，打破村上春樹《挪威的森林》嘅銷量，成為當地史上最高銷量日本小說，就連柴崎幸都被小說嘅情節感動，佢話：「我一邊喊住，一口氣睇完本書，我希望自己可以談一次咁樣嘅戀愛。」