薛家燕（好姨）與苑瓊丹一向對傳統節日都甚為重視，為了迎接農曆新年，二人日前結伴辦年貨，好姨自言一向負責買年貨，而且每件事都取意頭，希望大家「煎堆碌碌，金銀滿屋」。
薛家燕與苑瓊丹日前齊往辦年貨，到了上環盞記買燕窩及海味，之後再到啟發茶莊買賀年糖果。在挑選海味時，兩人不時拿起海味又摸又聞，並齊聲表示選海味是一門高深學問。
苑仔說：「揀花膠最緊要厚身，花膠公嘅價錢會貴啲，咁大塊花膠可以分幾次食，將花膠浸過夜，再用薑葱出水，分開幾份放入保鮮袋，之後擺喺雪櫃冰格，煲湯或煮嗰時就拎一份出嚟解凍就得喇！」
好姨表示家中年貨都是由她一手包辦，年貨種類更必須取其好意頭，她說：「阿爸叫我記得買髮菜蠔豉，用嚟整發財好市，江瑤柱代表金銀滿屋，鮑魚即是年年有餘，冬菇咪係東成西就，重有一定要煲蓮藕湯，唔好以為係藕斷絲連，蓮藕切片後有一個個洞，即係路路相通咁解，賀年糖果就唔少得金色招財貓、金財神同今年嘅金雞，重有代表長壽嘅金龜朱古力。」
好姨每年年三十晚都會與父親及子女吃團年飯，但今年因要到美國登台所以要提早團年，好姨說：「雖然今個農曆年唔喺香港，不過傳統嘅嘢一樣做足，仔女負責寫揮春，今年嘅年花因為檢疫問題遲咗嚟貨，往年屋企都係擺牡丹、菊花同水仙，阿爸話姓薛嘅人唔適宜擺桃花。」
家燕姐表示在剛過去的一年多小人及是非纏身，不過卻獲高人指點在立春過後便會事事順利，總算令她放下心頭大石。
採訪、攝影：卓美娟
