黃伊汶（Emme）雖然曾經到外國留學，不過她對中國傳統節日卻十分重視，特別是每年的農曆新年，她必然會購買新床單和家居用品，並準備全套紅色衣物包括內衣褲等迎新歲，故被家人及親友取笑她做「八妹仔」。
黃伊汶日前到銅鑼灣一家居用品店選購床單和地氈等，原來這是Emme每年農曆新年前必做的例行公事，因她相信新一年換上新用品會帶來好運。
Emme說：「咁新年啲人都成日話送舊迎新啦，加上阿媽都冇我咁迷信，所以每次新年都係由我負責去換晒屋企啲嘢。我上至地氈、床單，下至睡衣、底衫褲都要係新嘅，如果唔係我就覺得好唔老嚟。加上每年都有好多人上我屋企拜年，咁我一定要將屋企布置到靚靚㖭啦。」
Emme又表示新年的傳統習俗她都會一一遵守，她笑說：「好多時都係我提屋企人要用碌柚葉沖涼，同埋初一千祈唔可以掃地，因為咁樣會掃走晒啲財氣㗎。」
她續說：「不過每年年初一會有好多親戚朋友上我屋企拜年，之後地下一定有好多瓜子殼，好彩我隻狗一見到啲瓜子殼就會食晒佢，咁我就唔使破戒掃地啦。」
另外，Emme透露新年時的主要節目是與婆婆打麻將，為了發新年財，迷信的她必然會穿上紅色衣物上陣，就連內衣褲都是紅色的，她笑道：「真係唔好唔信邪呀，我試過有一年唔係着紅色底底打牌就輸錢，到第二年換番紅色之後就真係一家贏三家，自此之後我屋企人就封咗我做八妹仔啦。」
採訪：李珮洳
攝影：陳志嵐
場地提供：Francfranc
