○三年港姐季軍戚黛黛去年在銅鑼灣開設了一間飾物店，雞年將至，生肖同樣屬雞的她引入大量雞飾物擺賣。戚黛黛又表示會買桃花裝飾舖頭和寓所，希望來年能行桃花運，找個理想男友。
二○○三年度港姐季軍戚黛黛自從卸任後，一直主持無綫兒童節目，為了令生活更充實，她去年在銅鑼灣開了一間飾物店。
雞年將至，碰巧現年二十四歲的戚黛黛亦是屬雞，故此她從各地大量搜購有關雞的飾物在店內擺賣。
戚黛黛日前說：「好多貨都係去旅行，或者出外面做嘢時見到得意就買，其實我不時都入好多雞飾物，可能因為自己鍾意，又係屬雞，尤其出年又係雞年，所以我乜雞都有，有瓷器雞、藤雞、木雞、雞公仔。」
戚黛黛還打算買桃花布置舖頭和寓所，她說：「我上年屋企有擺桃花，所以今年都諗住去花巿，揀兩棵桃花擺吓，除咗想拍拖旺桃花之外，我做呢行都想人緣好，不過聽人講話圍住棵桃花行幾個圈就有拖拍，上年我都有咁做，不過都唔得嘅。」
戚黛黛今年犯太歲，不知她有沒有做足化解方法，她說：「好似話去攝太歲，不過就算點我都會努力，希望新一年公司可以畀多啲嘢我做，𠵱家做兒童節目都好開心，本來我唔係特別鍾意小朋友，最初重以為會好麻煩，但係𠵱家同一班小朋友相處得好融洽。除咗做兒童節目之外，我希望試吓拍劇，作多方面嘗試。」
採訪、攝影：楊潔雯
