維拉前鋒安祖前晚喺聯賽入波，幫球隊作客迫和富咸一比一成功搶分；但呢位哥倫比亞國腳其實亦係球隊「失分罪人」，原因係喺比賽當中兩次主射十二碼都宴客！
呢兩個十二碼都係喺比賽後段出現，你話買咗維拉Ｗ嗰啲波友，真係多得安祖唔少。是但入一粒，計埋富咸完場前由奇勒嘅入波，維拉都全取三分吖！不過富咸都唔好得去邊，因為呢場波重有一球十二碼都係射失嘅，主射嘅就係富咸嗰邊嘅高爾。一場波出現三個十二碼嘅機會唔多，全部射失更加難。我求大俠又諗番起當年阿根廷國腳巴勒莫，喺美洲盃一場射失三個十二碼嘅戲劇性場面。
車路士領隊摩連奴八七年喺士砵亭一間大學攞咗個體育學士學位，但之後忙於發展足球事業，一直冇返大學攞番張證書；而間大學特登喺前日派人去倫敦送張證書畀摩連奴。摩連奴咁鬼忙，前晚喺賽後唔記得同布力般領隊曉士握手，可能都係忙過龍，唔係有心嘅。
伯明翰雖然喺轉會期執到幾件好嘢，包括借咗利物浦中場戴奧、又借得烏拉圭射手彭迪安尼，但前者響前晚聯賽之前受傷，起碼過兩個禮拜至用得；彭迪安尼重話根本唔想嚟英超，最想係去意甲聯費倫天拿。偏偏前晚就係靠彭迪安尼同另一新兵比歷克各入一球擊敗修咸頓，好嘢！
溝通係解決問題嘅最好方法。先前，巴塞隆拿會長拉樸達同副會長羅素關係好僵，羅素重講明夏天走人。日前，兩人終於坐低慢慢傾，重俾人見到佢哋笑笑口咁行出酒吧。咁咪重好，留低羅素，起碼朗拿甸奴唔會走；𠵱家巴塞個勢咁好，千祈唔好自相殘殺，益咗皇馬呀！
韋利呢排好fit，近九場入咗八球；佢就話全因減咗磅所致。但有雜誌披露，BOBO（韋利花名）一直對前女友念念不忘，點知對方就喺個人網站嘅男友一欄度刪咗佢個名；最慘係家陣個巴西模特兒女友，亦因為佢掛住舊情人而同佢分手。韋利要靠入波嚟解愁，所以咪咁fit咯！
逢周一至周五見報