何超儀自年前與英皇解約後，一直未有物色新經理人，近日她憑主演的《蝴蝶》獲提名今屆金紫荊獎的「最佳女主角」，不少娛樂商因而向她招手，其中林建岳旗下的經理人公司正密斟超儀加盟，簽約成數甚高。
何超儀年前與英皇解約後即與陳子聰結婚，其後未有再簽約任何公司，不過她在影壇的成績不俗，曾先後憑電影《地久天長》及《豪情》分別奪得金紫荊和金像獎的「最佳女配角」。
今年超儀以主演的《蝴蝶》入圍競逐金紫荊「最佳女主角」，與張栢芝角逐影后殊榮，難怪近來獲不少娛樂商打主意，據知林建岳旗下的紅館經理人公司正密斟超儀加盟，雙方合作成數極高。
日前超儀在將軍澳接受訪問時對此說：「係傾緊，但未落實。嗰時我因為要籌備婚禮，所以同英皇解約，當時我都冇諗過全職做娛樂圈。」問超儀婚後為何不專心做少奶奶？她卻說：「舊年無啦啦攞咗個獎，今年又有得提名女主角，我花咗咁多精神，都係想做個好演員，既然𠵱家被人認同，冇理由咁快去享福啫。」
未知超儀父親何鴻燊對女兒再次全身投入娛圈有何意見？她說：「爹哋都接受嘅，佢開通啲，我話畀佢聽入圍最佳女主角，佢呆咗一呆，有恭喜我。之前佢都為我攞獎而高興，尤其係我啲電影入圍影展，佢會覺得好光榮，代表到香港喎，佢幾pround（驕傲）㗎。屋企得我零零丁丁一個從事電影工業，得到人認同，喺佢心目中已經好叻喇。」
不少演員婚後都會影響受歡迎程度，超儀卻不表擔心，她說：「唔關事，妮歌潔曼（NicoleKidman）夠結咗婚啦，幾多男人鍾意佢呀，你話生咗小朋友就可能差少少。」超儀為了充實自己，還打算向舞台劇紅人詹瑞文拜師學藝。
採訪：朱倬誼
攝影：陳偉權
髮型：DY@HairCulture
Styling：文慧林
